Paunak 20 - Tedim Bible Revision 2017

¹ Leenggahzu in mi kam tamsakin khamtheih zu in mi kitawngsak a, zukhamna pen haina ahi hi.

² Kumpipaʼ hehna pen a lauhuai mahmah humpinelkai hawk bang hi a, kumpipa a hehsak khate in sih lawh uh hi.

³ Kitot khak ding pelhna in pahtak ngahna hi a, mihaite bek kitot ding ut uh hi.

⁴ Lo khawh hunin a kho nuam lo thadahpa in tuk anlak hun ciangin bangmah nei lo ding hi.

⁵ Mihingteʼ ngaihsutna pen a thuk sunga om tui tawh kibang a, thuthuk mu theite bek in suah khia thei hi.

⁶ Mi khempeuh pen mi citakin kigen kim uh hi; ahi zongin a citak takpi ding mi kimu zo ding ahi hiam?

⁷ Mi khat thumanin a hoihin a nuntak leh ama suanlekhakte mi hampha ahi uh hi.

⁸ Thukhenna tokhom tungah thu khenin a tu kumpipa in a mitin a etna tawh a hoih lote khen khia thei hi.

⁹ “Ka lungsim siangtho hi; mawhna ka nei het kei hi,” a ci thei ding mi kua om ahi hiam?

¹⁰ Tawisuang nam nih le piciang nam nih zangin mi khemna pen Topa in a deih lohna kibang hi.

¹¹ Naupangte nangawn mi citak mihoih ahihna a gamtatna panun kimu khia thei hi.

¹² Topa in khua muh nading mit, khua zak nading bil hong guan hi.

¹³ Lumlum lecin na zawng dinga, semsem lecin na hau ding hi.

¹⁴ Van leipa in van zuak pa kiangah, “Kiman kei, kiman kei,” cici khem a, a paikhiat khit ciangin sumdek siam mahmah ing, ci-in mi kiangah kisial hi.

¹⁵ Pilna tawh kam na pau theih leh kham le suangmanpha sangin a manpha zaw a nei na hi hi.

¹⁶ Mi khat in gamdang mi khatʼ leiba a lohsak dingin kam a hai ciam leh a ciam bangin a neihsa kilaksak takpi ding hi.

¹⁷ A man loin a kingah an pen lim zungzung a, ahi zongin a nung ciangin suangtang hai khak tawh a kibang ahi hi.

¹⁸ Hoihtakin geelna tawh nasepna tangtung hi. Geelna kician om lopi-in galsim dingin kipan kei in.

¹⁹ Mi a gen sia kawikawite in thu im thei lo hi. Tua banga mihai paute tawh kikhawl kei in.

²⁰ Na nu le na pa na samsiat leh khuamial sunga om meivak kisumit na bang ding hi.

²¹ A baih lamin hauh pakna pen a tawpna ah phattuamna om lo hi.

²² Miteʼ hong bawlsiatna thuk ding ngaihsun kei inla, Topaʼ hong huh ding ngak zaw in.

²³ Tawisuang nam nih a zangte Topa in mudah a, amah in tawikhaina man lote hoih sa lo hi.

²⁴ Topa in miteʼ gamtatna zia ding uk hi. Koici gamtat ding cih mihing in bangci theih ding ahi hiam?

²⁵ Pasianʼ tungah piak ding na ciam ma-in hoihtakin ngaihsun masa in. Tua hikeileh na kinung sik kha ding hi.

²⁶ A pil kumpipa in migilote teng khia a, khasiat loin gim pia gawp hi.

²⁷ Topa in mihing lungsim meivak bangin zang a, i sung tawng dongin hong mu tel hi.

²⁸ Kumpipa in thuman, thutang, citakin a uk lai teng a kumpi za ah kip bek hi.

²⁹ Khangnoteʼ thahatna pen amauʼ minthanna hi a, khanghamteʼ sam kanna pen amauʼ thupina lim ahi hi.

³⁰ Nakpi takin satna in misia kimlai a pha hong suah a, nakpi takin vuakna in i sung tawng hoih lohna teng a siangsak hi.