Paunak 2 - Tedim Bible Revision 2017

Pilna Zonna Hanga Phattuamna

¹ Ka ta aw, kong hilhte thei inla, kong gente mangngilh kei in.

² Pilna thute limtakin ngai inla, na theih tel zawh nadingin hanciam in.

³ Thu theih nading hanciam takpi inla, thu muh nading hahkat takpi in.

⁴ Ngun, ahih kei leh a kiseel sum manpha zon bangin, hahkatin pilna zong in.

⁵ Tua hileh, Topa zahtakna thu na thei dinga, Pasian na thei tel ding hi.

⁶ Bang hang hiam cih leh pilna a pia pa pen Topa hi a, amah pen pilna le siamna a hilh pa ahi hi.

⁷ Pasian in thuman mite pilna guan a, midikte a hu hi.

⁸ Amah in thutang mite cing a, amah a itte a kem hi.

⁹ Tua hileh thuman le thutang a hoih le a kilawm na thei ding hi.

¹⁰ Tua ciangin mipil na suak dinga, na pilna hangin nuam na sa ding hi.

¹¹ Na thungaihsut theihna le na thutelna in nangmah hong hu-in,

¹² a sia-in na gamtat khak ding hong kem dinga, kampauna tawh buaina a piangsak thei mi,

¹³ nuntakna manin a nungta lo, mawhna khuamial sungah a gamta,

¹⁴ a sia-in gamtat ding nuam a sa, a sia-a gamtatna ah a lungkim mahmah,

¹⁵ mi lungsim kawi, muan theih loh ding mite panin nang hong kem ding hi.

^16-17 A pasal tungah citak loin a pasal a nusia, Pasianʼ mai ah a kiciamna a mangngilh, kam khum mahmah tawh nangmah zol ding a hanciam, numei paktatte panin hong cing ding hi.

¹⁸ Tua nuʼ inn ah pai lecin sihna lampi a zui na hi a, misite gam a zuan na hi hi.

¹⁹ Tua bang numei tawh mawhna a bawl mite in nuntak nuam neikik ngei lo uh hi.

²⁰ Tua ahih manin mihoihteʼ gamtat bangin na gamta dinga, thuman miteʼ gamtatna na zui ding hi.

²¹ Bang hang hiam cih leh mi thuman, miginate, hih i leitungah teengin om ding uh a,

²² ahi zongin Pasian in leitung panin migilote lawn khia-in, singkung zungbawh bangin mawhneite bot khia ding hi.