Paunak 16 - Tedim Bible Revision 2017

Nuntakna le Gamtatna tawh kisai Paunakte

¹ Mite in bangbang a geel zongin Topaʼ deihna bang bekin a piang ding hizaw hi.

² Mihingte pen a gamtatna uh ah man kisa a, ahi zongin Topa in a khenna khat na om hi.

³ Na geelnate khempeuh Topa ap in; tua hileh na geelna bangin tangtung ding hi.

⁴ Topa in na khempeuh ngimna nei-in bawl a, migilote nangawn siatna a thuak dingin a bawl ahi hi.

⁵ Topa in a kihisak mite mudah a, amaute in gimna thuak hamtang uh hi.

⁶ Thumanna le cihtakna mawhmai ngahna hi a, Topa zahtakna siatna tawh kipelhna ahi hi.

⁷ Topaʼ deih bangin gamtatna pen galte nangawn lawm a kaih zawhna ahi hi.

⁸ Thuman loin hauhna sangin thumanin tawmno neihna a hoih zaw ahi hi.

⁹ Mihing in thu geel a, ahi zongin Topaʼ deihna bangin kisem khia hi.

¹⁰ Kumpipa in thuman genin thu a khen ciangin khial ngei lo hi.

¹¹ A man tawikhaina le tawi tehnate Topa aʼ hi a, a tawisuang khempeuh ama bawl sa ahi hi.

¹² Thumanin gamtatna bek in kumpi kipsak ahih manin a sia-a gamtat ding kumpite ut lo uh hi.

¹³ Kumpite in thuman genna deih uh a, thuman a gen mite it uh hi.

¹⁴ Kumpipa heh leh mi khatpeuh in sih lawh thei a, mipil khat in kumpipa lungdamsak thei hi.

¹⁵ Kumpipa maitai leh nuntakna hi a, ama pahtakna pen tuk hunin guah a zusak meiipi tawh kibang hi.

¹⁶ Kham sangin pilna hoih zaw a, ngun sangin thutheihna deihhuai zaw hi.

¹⁷ Mihoihte in siatna tawh a kipelh ding lampi tawn uh a, a lampi tot ding limtakin a ngaihsun mi in a nuntakna a hu ahi hi.

¹⁸ Kisaktheihna in siatna hong tuaksak a, kiphatsakna in pukna hong piangsak hi.

¹⁹ Mi kihisak tawh kipawlin vankisutte ngahna sangin mizawngte tawh kikhawlin mi neu a om hoih zaw hi.

²⁰ Thuhilhna a mang mite a maa vang dinga, Topa a muang mite a lung dam ding hi.

²¹ Lungsim pilte thumuhna tawh kampau uh a, amauʼ kam khumna zaknophuai kisa semsem hi.

²² Pilna pen mipilte adingin hinna tuinak bang hi a, mihaite ahihleh amauʼ haina mah in gimna thuaksak hi.

²³ Mipilte in thu ngaihsun kawmin kampau uh a, amauʼ pauna zaknophuai semsem hi.

²⁴ Kam khum pen khuaizu bang hi a, i kam ah khum a, i pumpi adingin zong hoih mahmah hi.

²⁵ Hoih hi, ci-in i ngaihsut thu khat pen sih theih nading thu na hi zawsop thei hi.

²⁶ An duhna in mi na semsak a, gilkialna in nak sepsak semsem zaw hi.

²⁷ Migilote in siat nading bek zongzong uh a, a kampaunate uh na a kaang tum thei meikuang tawh kibang hi.

²⁸ Mihoih lote in kitotna piangsak a, mi gensiate in lawmta ki-it kimlai kimudahsak hi.

²⁹ A ngongtat mite in a lawmte zol a, lungkhamna sung tunpih hi.

³⁰ A mit hong sitsante thusia a ngaihsun hi a, a neh hong piksante thusia geel ahi hi.

³¹ A teekteʼ sam kang minthanna lukhu hi a, thumanin nuntakna tawh a ngah ahi hi.

³² Thahatna sangin lungduaina hoih zaw a, khuapi khat uk zawhna sangin eimah ki-uk zawhna hoih zaw hi.

³³ Mite in bangbangin ai a san zongin, a piang ding thu pen Topaʼ deihna bang bek hizaw hi.