Paunak 13 - Tedim Bible Revision 2017

¹ Ta pil in a paʼ hilhna mang a, a kihisak mi in a khial min pua nuam lo hi.

² Mihoihte in a kam siamna bangun thaman sang a, mizuaute pen siat tat ding bek ut uh hi.

³ Pau a ki-ip zo mi in a nuntakna a hu hi a, a mawk paupau mi pen amah a kisiasak tawm ahi hi.

⁴ Thadah mi in a deih ngah zo lo a, nasep hahkat mi in a deih khempeuh ngah zo hi.

⁵ Thuman mi in zuau thu deih lo a, a gilo mi in gensiatna le mindai nading bek a pau hi.

⁶ Thumanna in midikte hu a, gitlohna pen mawhneiteʼ pukna ahi hi.

⁷ Mi pawl khatte, zawng napi-in kihausak uh a, mi pawl khatte, hau napi-in kizawngsak uh hi.

⁸ Mihau paʼ sum hauhna in a nuntakna tan khia zo a, mizawng pa in a kitatna ding bangmah nei lo hi.

⁹ Thuman mite khuavak bangin taang lela a, migilote meivak bangin mit pak hi.

¹⁰ Hilh ding ut lo, kihihsakna in kitotna bek piangsak thei a, hong kithuhilh ding utna pen a hoih zaw ahi hi.

¹¹ Ol takin hauh pakna oltak mahin kiamkik pah a, haksapi-in hauh tohna khangto semsem hi.

¹² Lamet tun lohna in lungsim cinasak a, deihna tangtunna pen lungdamna ahi hi.

¹³ Thu kihilh ding ut lohna pen siat ding utna hi a, thukihilhna zuihna pen lungnopna ahi hi.

¹⁴ Mipilteʼ thuhilhna pen nuntakna tuinak bang hi a, sihna thang tawh kipelhna ahi hi.

¹⁵ Thungaihsut theihna pen maipha ngahna hi a, zuautatna in lungkhamna bek piangsak hi.

¹⁶ Thungaihsun theite pilna tawh gamta a, mihaite in a haina taangko hi.

¹⁷ Kamtai gina lo in mi lungkhamsak a, a citak thupuak pa in mi lungdamsakkik hi.

¹⁸ Thukihilhna a zui lo mi in zawnna le mindaina ngah a, thukihilhna a zui mi in minphatna le pahtawina a ngah hi.

¹⁹ Deihna ngahna in lungsim nuamsak a, siat gamtatna panin mihaite pial khia nuam lo hi.

²⁰ Mipil tawh kikhawl lecin na pil dinga, mihai tawh kikhawl lecin gimna na thuak ding hi.

²¹ Tuahsiatna in mawhneite sulzuih kawikawi a, midikte tuahpha kawikawi hi.

²² Midikte in a tu a tateʼ luah ding gamh nei uh a, mawhneiteʼ neihsate ahihleh midikte ading hi lel hi.

²³ Lo thak panin mizawngteʼ khamkhop ding an piang kha dinga, ahi zongin thuman lohna hangin tua nangawn maimang thei ding hi.

²⁴ A ta a tai nuam lote a ta mudah hi a, a ta a itte in limtakin thuhilhin a tai hi.

²⁵ Thuman mi in a kham ding nei-in gilvah a, a gilo mi in nektawm ding nei loin a gil a kial hi.