Paunak 12 - Tedim Bible Revision 2017

¹ Pilna a deihte, kithuhilh ding ut uh a, kitai ding ut lohna pen haina ahi hi.

² Mihoihte in Topaʼ maipha ngah a, siatna a gamtate amah in a mawhsak hi.

³ Gitlohna in lungmuanna piangsak lo a, thuman mite lungmuang takin om uh hi.

⁴ Zi hoih pen a pasalʼ minthanna le lungdamna hi a, a pasal a maizumsak zi pen a pasal adingin a dam thei lo guhnatna tawh kibang hi.

⁵ Thuman mite in a kilawm a kituakin hong bawl a, migilote bek in hong khem nuam hi.

⁶ Migiloteʼ thugente mi thahnopna bekbek hi a, midikteʼ thugente in lauhuaina sunga om mite a hon khia hi.

⁷ Migilote in sihna tuakin cimang a, thuman mite nungta-in khang kizom hi.

⁸ Mipilte kiphatin kipahtawi a, mihaite kineu-et hi.

⁹ Nektawm ding nei lopi-in mi lian bangin omna sangin nuntak nading na semin mi mawkmawk hihna hoih zaw hi.

¹⁰ Midikte in a gannote hoihtakin don a, migilote in a gannote bawlsia hi.

¹¹ Nakpi takin lokhote in an hau a, man nei lopi-in hun beisakna in haina ahi hi.

¹² Migiloteʼ belh mun muanhuai pen lei khal bangin kitamzan a, mihoihteʼ zung kip tawntung hi.

¹³ Migilote in a zuaugenna uh awk pih a, thuman mite buaina tawh kipelh hi.

¹⁴ Mite in kam hoih pauna hangin thaman ngah uh a, a sepna bangun zong thaman ngah uh hi.

¹⁵ Mihaite pen amau mah thuman kisa tawntung a, mipilte in miʼ thugenna ngai nuam uh hi.

¹⁶ Mihaite in a hehna uh langsak pah uh a, mipilte in a hehna uh ip zo hi.

¹⁷ Thuman mite in thu taktak mah gen uh a, zuau tecite in khemna thu bek gen uh hi.

¹⁸ Ngaihsun lo-a kampauna in tem hiam bangin mi liamsak thei a, mipilteʼ kampauna in tua bang liamna damsak thei hi.

¹⁹ Thuman genna kip tawntung a, thuzuau genna tomno sung bek kimang hi.

²⁰ Thusia ngaihsunte lungkham uh a, thuhoih vaihawmte lungdam uh hi.

²¹ Thuman mite tungah thusia tung lo a, migilote lungkhamna tawh kidim hi.

²² Topa in zuaugen mite mudah a, mi citakte tungah a lungdam hi.

²³ Mipilte in a theihna uh im khinkhian a, mihaite in a haina uh pho laklak hi.

²⁴ Mi thanuamte vanglian a, mi thadahte sila suak hi.

²⁵ Lunghihmawhna in lungkhamna piangsak a, kampau hoih in mi lungdamsak hi.

²⁶ Midikte in a gamtatna uh tel et a, migilote a gamtatna un lam pialsak hi.

²⁷ Thadahte a tup tung ngei lo a, a thanuamte in a deih ngah hi.

²⁸ Mi thumanteʼ gamtatna in nuntakna piangsak a, mihaiteʼ gamtatna in sihna piangsak hi.