Paunak 11 - Tedim Bible Revision 2017

¹ Tawikhaina man lo a zangte Topa in mudah a, tawikhaina man a zangte tungah Topa lungkim hi.

² Mi kiphasakte in min siatna ngah pak ding ahih manin a hoihbekin om ding hoih zaw tham hi.

³ Midikte thumanin gamta uh a, migilote amauʼ hoih lohna in susia hi.

⁴ Hauhna in sih nading panin hong hu thei lo a, thumanna in na sih ding hong hu thei hi.

⁵ Thumanna in midikteʼ nuntakna a nuam zaw-in piangsak a, migilote in amauʼ gitlohna mah puk lawh uh hi.

⁶ Thumanna in midikte hon khia a, thuman lo mite in amauʼ huaihamna mah awk pih uh hi.

⁷ Migilote a sih ciangin a lametna teng uh tawh bei khawm a, hauhna suanna a mawkna a suak hi.

⁸ Lungkhamna a tuah loh nadingun midikte kihu a, migilote tungah lungkhamna tung zaw hi.

⁹ Pasian a ngaihsun lo miteʼ thugenna hangin mite in siatna thuak a, midikteʼ pilna hangin mite in hotkhiatna ngah uh hi.

¹⁰ Midikte a tuahphat ciangin khua sungah lungdamna om a, migilote a sih ciangin zong khua sungah lungdamin kikona a om hi.

¹¹ Thuman miteʼ omna hangin khuapi a lian suak a, migiloteʼ kampauna hangin khuapi a sia suak hi.

¹² Simmawhna tawh midang hopihna pen haina hi a, mipilte pau loin om dide hi.

¹³ Mi a gen siasiate tungah thusim kigen ngam lo a, a muanhuai miteʼ tung bekah thusim kigen ngam hi.

¹⁴ Thulamlak ding a nei lo mihingte kipuk uh a, thulamlak tampi neihna pen lungmuanna ahi hi.

¹⁵ Midang khatʼ leiba lohsak ding na kiciam leh na kisik ding hi. Tua bang thu ah kihel kei lecin nang adingin hoih zaw hi.

¹⁶ A dik numei kizahtak a, a dik lo numei mindai hi. A thadah mi in sum nei ngei lo a, a hahkat mi in sum hau hi.

¹⁷ Migi lecin nang adingin a hoih a bawl na hi a, gilo lecin nang mahmah a kigimsak na hi bek hi.

¹⁸ Migilote in a man nei taktak bangmah ngah lo a, thumanin a gamtate in peel loin thaman hoih a ngah hi.

¹⁹ Thumanin gamtat ding a hanciamte nungta dinga, a sia-in a gamta teiteite si ding uh hi.

²⁰ Topa in lungsim gilote mudah a, a manin a gamtate tungah a lungkim hi.

²¹ Migilote in gim a thuak hamtang nading, midikte gimna tawh a kipelhna ding teltakin thei in.

²² Thu a ngaihsun thei lo numei melhoih pen vokpi muk a om kham nakbah tawh kibang lel hi.

²³ Mihoihteʼ deihna thuhoih tawh kizom tawntung a, migiloteʼ deihna a tun ciangin mi khempeuh a heh hi.

²⁴ Mi pawl khat in sum zang ziahziah napi-in hau semsem uh a, mi pawl khat cil mahmah napi, zawng semsem hi.

²⁵ A cingh mite hau semsem dinga, midang a huhte in huhna mah ngahkik ding hi.

²⁶ An man khan ding ngakna-in a zuak nuam lote kisamsia a, lei nop hunin a zuak pahte kiphat hi.

²⁷ Thuhoih a hanciamte in pahtakna ngah a, siatna a hanciamte in siatna mah ngah hi.

²⁸ Tuk lai-a singteh tam bangin midikteʼ hauhna khang dinga, phalbi lai-a singteh pulh bangin hauhna a suangte kiam ding uh hi.

²⁹ A innkuan sung a uk khial mite hawmsuak dinga, a haite pen mipilteʼ sila suak tawntung ding hi.

³⁰ Midikte a khansau a, migilote khansih hi.

³¹ Mihoihte hih leitungah thaman kipia ahihleh migilo le mawhneite gimna kipia zaw kan ding hi.