Paikhiatna 40 - Tedim Bible Revision 2017

Biakbuk Dinsakna le Apna

¹ Topa in Moses kiangah,

² “Kha masa a ni masa ni-in nangmah in kikhopna buk ahi biakbuk na lam ding hi.

³ Tua buk sungah thuciamna singkuang na koih dinga, dalna puan tawh singkuang na dal ding hi.

⁴ Tua ciangin sabuai tum pihin a om ding bangin na koih ding hi. Meivak khuam zong tum pihin a meivakte na bulh ding hi.

⁵ Thuciamna singkuang mai ah paknamtui hal nadingin kham biakna tau na koih dinga, biakbuk kongkhak dingin kong puankhai na khai ding hi.

⁶ Kikhopna buk ahi biakbuk kongkhak mai ah meihal biakna tau koihin,

⁷ kikhopna buk le biakna tau kikalah kisilna kuang na koih dinga, a sungah tui zong na koih ding hi.

⁸ A kimkot ah buktual na bawl dinga, buktual kongpi dingin kong puankhai na khai to ding hi.

⁹ “Tua ciangin sathau la-in, biakbuk le a sunga om khempeuh na nuh dinga, biakbuk le a inn sung van khempeuh na ap ding hi. Tua ciangin a siangtho biakna van a suak ding hi.

¹⁰ Nangmah in meihal biakna tau le a nazat khempeuh zong sathau nuhin biakna tau na ap dinga, tua biakna tau a siangtho pen hi ding hi.

¹¹ Kisilna kuang le a ngakna zong sathau nuhin na ap ding hi.

¹² “Tua ciangin kikhopna buk kongkhak ah Aaron le ama tapate paipihin, tui tawh amaute na sil dinga,

¹³ amah in keima tungah siampi na a sep theih nadingin puan siangthote Aaron silhsakin, amah sathau nilhin na ap ding hi.

¹⁴ Tua ciangin ama tapate zong paipihin puan tungsilhte na silhsak dinga,

¹⁵ amaute in keima tungah siampi na a sep theih nadingun amauteʼ pa sathau na nilh bangin amaute zong sathau na nilh ding hi. Amauʼ sathau kinilhna in amauʼ khang tawntungin siampi hi paisuaksak ding hi,” a ci hi.

¹⁶ Moses in zong Topa in amah a thupiak sa khempeuh tawh kituakin a hih hi.

¹⁷ A kum nihna a kha masa, a ni masa ni-in biakbuk kilam hi.

¹⁸ Moses in biakbuk lam hi. Amah in a bullente koihin, a khuampeekte phut a, a zawlte khumin, a khuampite a phut hi.

¹⁹ Biakbuk tungah a tungkhuhna zal a, Topa in Moses a thupiak sa bangin puanbuk a tung a khuh hi.

²⁰ Topa in Moses a thupiak sa bangin amah in thuciamna suangpek la-in singkuang sungah koih a, singkuang tungah a zawlte koihin, singkuang tung sanah hehpihna tokhom a nga hi.

²¹ Biakbuk sungah singkuang paipihin, kong puankhai dalna puan khai a, thuciamna singkuang a dal hi.

²² Topa in Moses a thupiak sa bangin, amah in biakbuk leilu lam pang, dalna puan pualam, kikhopna buk sungah sabuai koih a,

²³ Topaʼ mai tua sabuai tungah a om ding bangin anlum a koih hi.

²⁴ Topa in Moses a thupiak sa bangin, amah in biakbuk leitaw lam pang, sabuai tawh a kigalsai-in, kikhopna buk sungah meivak khuam koih a,

²⁵ Topaʼ mai ah meivakte a koih hi.

²⁶ Topa in Moses a thupiak sa bangin, amah in kikhopna buk sung, dalna puan mai ah kham biakna tau koih a,

²⁷ tua tungah a namtui paknamtui a hal hi.

²⁸ Amah in biakbuk kongkhak ding kong puankhai a mun dingah a khai hi.

²⁹ Topa in Moses a thupiak sa bangin amah in kikhopna buk ahi biakbuk kongkhak ah meihal biakna tau koih a, tua tungah meihal biakna le an tawh biakna a pia hi.

³⁰ Kikhopna buk le biakna tau kikalah kisilna kuang koih a, tua sungah kisil nading tui zong a koih hi.

³¹ Moses le Aaron le a tapate in amauʼ khut le a khete uh tua tui tawh a sil uh hi.

³² Topa in Moses a thupiak sa bangin, kikhopna buk ah amaute a pai ciang le biakna tau nai ah a pai uh ciangin amaute kisil uh hi.

³³ Amah in biakbuk le biakna tau kiimah a buktual bawl a, buktual kongpi kong puankhai a khai hi. Tua ahih ciangin Moses in a nasep a man ta hi.

Biakbuk tungah Meii

³⁴ Tua ciangin meii in kikhopna buk tuam a, biakbuk sungah Topaʼ minthanna vang a dim hi.

³⁵ Tua ahih manin kikhopna buk sungah Moses tum thei lo hi.

³⁶ A khualzin sung tawntung uh biakbuk tung panin meii a kilakkhiat toh peuhpeuh ciangin Israel mite mailam nawtin pai uh a,

³⁷ ahih hangin meii a kilakkhiat kei leh a kilakkhiat ni mateng amaute paikhia lo uh hi.

³⁸ Bang hang hiam cih leh a khualzin sung tawntung uh Israel mi khempeuhʼ muhna ah biakbuk tungah sunin Topaʼ meii om a, zanin mei a om hi.