Paikhiatna 11 - Tedim Bible Revision 2017

Tacil Sih nading Kigenkhol

¹ Topa in Moses kiangah, “Faro le Egypt tungah gimna khat ka tungsak lai dinga, tua khit ciangin hih lai mun panin amah in note hong paisak ding hi. Amah in note hong paisak ciangin note hong hawl khia mangkhin ding hi.

² Pasal peuhmah in a veengte kiang pan, numei peuhmah in zong a veengteʼ kiang mah panin ngun le kham kizepnate a nget theih nadingun miteʼ zakin thu gen in,” a ci hi.

³ Topa in Egypt miteʼ muhna ah mite maipha pia hi. Tua tham loin, mipa Moses pen Egypt leitang tung, Faroʼ nasemteʼ muhna le miteʼ muhna ah lian mahmah hi.

⁴ Moses in Faroʼ kiangah, “Topa in hih bangin ci hi: Zankim pawlin Egypt miteʼ lakah ka pai ding hi.

⁵ Kumpi tokhom tunga tu Faroʼ tacil a kipanin an gawina nung a a om nasem numei tacil dong le ganhing tacil khempeuh, Egypt gam sungah tacil khempeuh si ding hi.

⁶ Cikmahin tua bang a omngei lo, cikmah ciangin zong a omkik ngei lo ding kahna lianpi Egypt leitang tung khempeuh ah om ding hi.

⁷ Ahih hangin Egypt mite le Israel mite a kilamdangin Topa in bawl hi, ci-in na theih nadingun Israel mite, mihing hitaleh ganhing hitaleh, ui khat nangawn zong tau lo ding hi, ci hi” a ci hi.

⁸ Tua ciangin Moses in Faroʼ kiangah, “Na uliante khempeuh keima kiangah hong pai sukin, keima kiangah hong kun ding uh a, ‘Nang le nangmah hong zui khempeuh paikhia un,’ hong ci ding uh hi. Tua khit ciangin kei ka paikhia ding hi,” ci thuah lai hi. Tua ciangin Faroʼ kiang panin amah a heh mahmah sa-in a paikhia hi.

⁹ Tua ciangin Topa in Moses kiangah, “Egypt tungah nalamdang tam ka bawl theih nadingin Faro in na thu hong ngai lo lai ding hi,” a ci hi.

¹⁰ Moses le Aaron in hih nalamdangte khempeuh Faroʼ mai ah a bawl uh hi. Topa in Faroʼ lungsim khauhsak a, amah in Israel mite a leitang panin pai khiasak lo hi.