Paikhiatna 1 - Tedim Bible Revision 2017

Egypt ah Israel-teʼ Thuakna

¹ Jakob tawh Egypt ah a hong pai, amauʼ innkuan ciat tawh ahi Israelʼ tapateʼ minte:

² Reuben, Simeon, Levi le Judah,

³ Issakhar, Zebulun le Benjamin,

⁴ Dan le Naftali, Gad le Asher ahi hi.

⁵ Jakobʼ suanlekhakte khempeuh mi sawm sagih hi a, Josef pen Egypt ah na om khinzo hi.

⁶ Tua ciangin Josef le a sanggamte le tua khangmi khempeuh si uh hi.

⁷ Ahih hangin Israelʼ suanlekhakte pungin nakpi takin khang uh hi. Amaute tampi pha-in nakpi takin khang uh ahih manin Egypt gamah dim uh hi.

⁸ Tu-in Josef a thei lo kumpi thak khat Egypt gamah hong khang hi.

⁹ Amah in a mipihte kiangah, “En un, Israel mite eite adingin tam lua-in thahat lua uh hi.

¹⁰ Amaute hong tam kha ding uh ahih manin ngaihsut siamna tawh amaute hih ni. Eite tungah gal hong om leh amaute in i galte pawlin eite hong do-in hih gam panin tai khia kha ding uh hi,” a ci hi.

¹¹ Tua ahih ciangin nasepna tawh amaute a gimsak dingin amaute tungah nasem ukte koih uh hi. Israel mite in Faro adingin vankoihna Pithom le Rameses khuapite lam uh hi.

¹² Ahih hangin amaute a kinenniam ciangin amaute tampi pha zaw-in kizelthang zaw uh hi. Egypt mite in Israel mite kihta uh hi.

¹³ Tua ahih ciangin amaute in Israel mite a gim mahmah in na semsak uh a,

¹⁴ buan le leiseek tawh nasepna le lo sungah nasep namkim khempeuh tawh amauʼ nuntakna haksasak uh hi. Israel miteʼ sepna khempeuh ah amaute in a gim mahmah in semsak uh hi.

¹⁵ Tua ciangin Egypt kumpipa in Hebru mi nau a domsakte, khatʼ min Shifrah, a dang khatʼ min Puah a kicite kiangah,

¹⁶ “Hebru numeite nau domin, nausuahna tutphah tungah a tut ciangun, tapa ahihleh a naungek na that ding uh a, ahi zongin tanu ahihleh na nungtasak ding uh hi,” a ci hi.

¹⁷ Ahih hangin naudomte in Pasian zahtak uh hi. Egypt kumpipa in amaute a thupiak bangin gamta lo uh a, nau pasalte nungtasak uh hi.

¹⁸ Tua ahih ciangin Egypt kumpipa in naudomte samin amaute kiangah, “Bang hangin hih bangin gamta a, nau pasalte nungtasak na hi uh hiam?” a ci hi.

¹⁹ Naudomte in Faroʼ kiangah, “Hebru numeite le Egypt numeite a kibat lohna hang ahi hi. Bang hang hiam cih leh amaute thadim uh a, amauʼ kiangah naudomte a tun ma-in amaute na suak khin pahpah uh hi,” na ci uh hi.

²⁰ Tua ahih ciangin Pasian in naudomte limbawl hi. Mite khangin pawl cing semsem uh hi.

²¹ Naudomte in Pasian zahtak uh ahih manin amah in amaute tungah suanlekhak a pia hi.

²² Tua ciangin Faro in a mipihte khempeuh thu pia a, “Hebru mite sung panin tapa a suak khempeuh Nail gun sungah na khia ding uh a, ahi zongin tanu khempeuh na nungtasak ding uh hi,” a ci hi.