Micah 5 - Tedim Bible Revision 2017

¹ Jerusalem khua mite aw, na kulh sung uh ah lut un. Eite hong ki-umcih a, Israel makai pa a hong sim uh ahi hi.

Bethlehem Khua Pan a Piang Honpaʼ Ukna

² Bethlehem Efrathah khua aw, nang pen Judah gamah khua neu pen khat na hi a, ahi zongin nang sung panin Israel-te a uk ding khat ka piangsak ding hi. Ama gui pen tangtawng pek tawh kizom hi.

³ Tua ahih ciangin, numei naupaii nu, a nau a suah khit mateng, amauʼ galteʼ khut sungah Topa in a mite a pia phot hi. Ama hong khan ciangin sal a a om a gam mite a mipihte uh tawh hong kigawmkik ding hi.

⁴ Amah in Topaʼ thahatna tawh a mite uk dinga, Topa ama Pasianʼ vangliatna tawh a uk ding hi. Leitung mi khempeuh in ama liatna phawk ding uh ahih manin ama mite lungmuang takin om thei ding uh hi.

⁵ Amah in lungnopna hong omsak ding hi. Assiria mite in i gam hong simin i galdalna teng hong suk ciangin, amaute a do dingin i makai hat pen teng i sawl ding hi.

⁶ A namsau uh tawh Nimrodʼ gam ahi, Assiria gam zo ding uh a, Assiria mite in i gam hong sim ciangin amauteʼ kiang panin eite hong hon khia ding uh hi.

⁷ Tua ciangin a om lai Israel mite pen Topa in minam tampite adingin a piak, lopate a nosak zing daitui, lopate a khangsak guahtui, a bang ding uh hi. Amaute in mihingte muanin nei loin Pasian bek a muang ding uh hi.

⁸ A om lai Israel mite pen minam dangteʼ lakah, gamlak ah sa a beng, tuute a tuah ciangin manin balnen gawp a, a kam sung pan a hon khia zo a om lo, humpinelkai a bang ding uh hi.

⁹ Israel-te in a gal khempeuh uh zo gawpin a susia mang ding uh hi.

¹⁰ Topa in hih bangin ci hi: Tua hun ciangin na sakolte uh hong paih khiatsakin, na leengte uh ka susia ding hi.

¹¹ Na gam sung uh a om khuapite susia-in, na galpanna munte uh ka phel khia ding hi.

¹² Na mitphial siamte uh susia gawpin, ai a san thei mi kong omsak nawn kei ding hi.

¹³ Noteʼ biak milimte le na biakna songte uh ka susia gawp dinga, noteʼ bawl sa nate na bia nawn kei ding uh hi.

¹⁴ Na gam sung uh a a om Asherah nusian milimte hong bawh khiatsakin, na khuapite uh ka susia ding hi.

¹⁵ Keima thu a hong mang lo minamte tungah hehna tawh phu ka la ding hi.