Mattiu 3 - Tedim Bible Revision 2017

Tuiphumpa Johanʼ Thuhilhna

¹ Tua hun laitakin tuiphumpa Johan hong pai-in, Judea gam sungah thuhilh hong kipan a,

² “Vantung ki-ukna hun hong nai ta ahih manin na mawhnate uh kisikkik un,” a ci hi.

³ Kamsang Isaiah in, “Gam sungah mi khat kiko a, ‘Topaʼ pai nading lampi bawl unla, a tot ding lampi tangsak un,’ ci hi,” ci-in a gen ciangin hih Johanʼ thu a gen ahi hi.

⁴ Johan in kalaoh mul kigan puan silhin, savun kawnggak tawh a kawng gak a, kauphe le gamlak khuaizu tawh a kivak hi.

⁵ Jerusalem khua, Judea gam sung le Jordan Gun kiim gam panin mite hong pai uh hi.

⁶ Amaute in a mawhnate uh hong pulak uh a, Johan in Jordan Gun sungah amaute a tuiphum hi.

⁷ Ahi zongin Farisi mite le Saddusi mite tampi tak tui a kiphum dingin a hong pai a muh ciangin Johan in amaute kiangah, “Gul bangin ngian a zang note aw, a hong tung ding Pasianʼ hehna panin na suahtak theih nading uh kua in hong hilh khol ahi hiam?

⁸ Na kisikkikna uh a kilangsak ding gamtatna gamta unla,

⁹ ‘Abrahamʼ suante ihi ngawn hi,’ cihna lungsim nei mawk kei un. Keʼn kong cih in ah, Pasian in hih suangte nangawn Abrahamʼ suanlekhakte-in a bawl thei hi lel hi.

¹⁰ Tu mahmah in sing a bulphuk dingin hei tawh kingim zo hi. Tua ahih manin gah hoih a gah lo sing khempeuh kiphukin meikhuk sungah kikhul ding hi.

¹¹ Na kisikkik khitna uh a kilat nadingin tui sungah note ka hong phum a, ahi zongin kei nungah a hong pai pa in Kha Siangtho le mei sungah note hong phum ding hi. Tua a hong pai ding pa pen kei sangin nakpi takin lian zaw a, ama khedap a tawisak ding nangawnin ka kilawm zo nai kei hi.

¹² Amah in a khut ah anzapna tawi-in a ante zap a, a taksate khawmin a ansal sungah koih dinga, a ansite ahihleh a mit ngei lo mei sungah a khul ding hi,” ci-in thu a hilh hi.

Jesu A Kituiphumna

¹³ Tua laitakin Galilee gam panin Jesu hong pai a, Johanʼ khut sungah a kituiphum dingin ama omna Jordan Gun ah a hong tung hi.

¹⁴ Ahi zongin Johan in na tuiphum nuam lo a, “Nang in kei nong tuiphum dingin a kilawm zaw kimlai, keiʼ phum dingin nang hong pai zawsop na hi hiam?” a na ci hi.

¹⁵ Ahi zongin Jesu in, “Pasian in hih dingin kisam a sak khempeuh i hih ding a kilawm thu ahih manin tu-in hong phum hoh in,” a cih ciangin Johan in zong a mang hi.

¹⁶ Jesu a kituiphum khit phetin tui sung panin a paikhia pah hi. Tua laitakin vantung hong kihong a, vakhu bangin Pasianʼ Kha Siangtho hong kum sukin ama tungah a khawl a mu hi.

¹⁷ Tua sung mahin vantung panin aw khat hong ging a, “Hih pen ka it mahmah ka Tapa hi a, ama tungah ka lungkim mahmah hi,” a hong ci hi.