Mattiu 28 - Tedim Bible Revision 2017

Thawhkikna

¹ Sabbath ni khit, Nipi ni zingsang khua hong vak kuan ciangin Magdala khuami Mary le a dang Mary, daihawh dingin a va pai uh hi.

² Thakhatin zin nakpi takin hong liing hi. Topaʼ vantungmi khat, vantung panin hong pai suk a, han hukna suang a likkhiat khit ciangin a tungah a tu hi.

³ Ama mel, khuaphialep tawh kibang a, a puan zong vuk bangin a pak hi.

⁴ Han cingte in kihta lua uh ahih manin liingin a sibup uh hi.

⁵ Ahi zongin tua vantungmi in numeite kiangah, “Lau kei un. Singlamteh tungah a kithat Jesu a zong na hih lam uh ka thei hi.

⁶ Hih lai ah amah om nawn lo hi. A gen sa bangin thokik khinta hi. Hong pai unla, amah a kisialna mun hong en un.

⁷ Tu-in manlang takin va ciah unla, a nungzuite kiangah, ‘Sihna panin Jesu kithosak khin a, Galilee gam note mai ah a pai ding hi. Tua lai ah amah na mu ding uh hi,’ ci-in va gen un. Hih kong gen thute hoihtakin ciamteh un,” a ci hi.

⁸ Tua ahih manin numeite zong laukawm, nuamkawmin nungzuite kiangah hih thu a ko dingin a tai pah uh hi.

⁹ Jesu in lampi ah tua numeite na dawntuahin, “Lungnuam un!” ci-in a na hopih hi. Numeite in zong Jesu a khe ah lenin a bia uh hi.

¹⁰ Tua ciangin Jesu in amaute kiangah, “Lau kei un. Pai unla, Galilee gamah ka sanggamte a pai nadingin va gen un. Tua lai ah kei hong mu ding uh hi,” a ci hi.

Han Cingteʼ Thu Zaksakna

¹¹ Tua bangin numeite a pai laitakin han a cing galkapte pawl khat khua sungah hong ciah uh a, siampi liante kiangah a thupiang khempeuh a ko uh hi.

¹² Siampi liante in upate tawh thu kikupna khat nei-in vai a hawm khit uh ciangin sum tampi tawh galkapte golhguk uh a,

¹³ “Mite kiangah, ‘A nungzuite, zanin ka ihmut kalun hong pai-in a luang a gu khia uh hi,’ ci-in gen un.

¹⁴ Gam ukpa Pilat in hih thu a zak ciangin ama lungkim zawh nading dongin ka na genpih ding uh a, note adingin bangmah lunghihmawhna om lo ding hi,” a ci uh hi.

¹⁵ Tua ahih manin galkapte in a sum sang uh a, a kisawl bangin a gamta uh hi. Tua ahih manin tu ni dongin Jew mite lakah tu-a bangin hih thu a kigengen lai ahi hi.

Jesu in Sawm le khatte Sawl

¹⁶ Nungzui sawm le khatte zong, Jesu in a gen sa bangin Galilee gam a mual tungah a pai uh hi.

¹⁷ Amaute in Jesu a muh uh ciangin bia uh a, ahi zongin pawl khat in um zo taktak lo uh hi.

¹⁸ Tua ciangin amaute mai ah Jesu hong pai a, “Leitungah ahi a, vantungah ahi zongin vangliatna khempeuh kei tungah hong kipia khinta hi.

¹⁹ Tua ahih ciangin note pai unla, midang khempeuh, keima nungzui mi suaksakin, Pa min, Tapa min le Kha Siangtho min tawh tui sungah na phum un.

²⁰ Tua ciangin note tungah kong gen thute khempeuh a zuih nadingun na hilh un. Hun bei dongin note a hong ompih tawntung ding ka hihna thu phawk ta un,” a ci hi.