Mattiu 22 - Tedim Bible Revision 2017

Mopawi Thu gentehna

¹ Jesu in amaute kiangah thu gentehna dang khat zangin thu hilh a,

² “Vantung ki-ukna zia pen a tapa adingin mopawi a bawl kumpipaʼ gamtatzia tawh kibang hi.

³ Mopawi siim dingin a khoh sa mite a sam dingin a nasemte sawl a, ahi zongin kuamah pai lo hi.

⁴ Tua ciangin nasem dangte sawl leuleu a, ‘Ka khohsak sa mite kiangah hih bangin va gen un: Ka bawngtalte le ka bawng no thaute kigo khin a, nitak an a min sa-in a om banah, na khempeuh a man sa-in om khinta hi. Mopawi an ne dingin hong pai ta un, ci hi, ci-in va gen un,’ a ci hi.

⁵ Ahi zongin a khoh sa mite in na thusim lo uh a, pawl khat in lo na kuan sanin, pawl khat in a sumbuk ah na paisanin,

⁶ a dangte in a nasemte manin a na sat gawp khit uh ciangin a na that uh hi.

⁷ Kumpipa zong heh mahmah a, a galkapte kuansakin tua mi thatte a thahsak khit ciangin a khua a hal tum sak hi.

⁸ Tua ciangin a nasemte kiangah, ‘Mopawi an a baih sa-in om a, ahi zongin ka sap mite a ne dingin a kilawm lo mi a suak uh hi.

⁹ Tua ahih manin lam lianpi ah va pai unla, mi na muh zahzah uh hong sam un,’ a ci hi.

¹⁰ Nasemte zong lam lianpi ah va pai uh a, mihoih mihoih lo ci loin a muh khempeuh uh va kaikhawm uh ahih manin mopawi bawlna inn sung dimin leengla hong om hi.

¹¹ “Kumpipa, a leenglate a en dingin a hong lut ciangin mopawi siimna puan a silh lo mi khat a mu hi.

¹² Ama kiangah, ‘Lawm aw, mopawi siimna puan silh lopi-in hih lai ah hong bangci lut theih na hi hiam?’ a cih ciangin tua mipa in a cih nading a thei kei hi.

¹³ Tua ciangin kumpipa in a nasemte kiangah, ‘A khut a khe hen unla, pualam khua mialna lakah lawn khia un; tua lai ah kapin a hagawi ding hi,’ a ci hi.

¹⁴ “Bang hang hiam cih leh mi tampi a kisap hangin tawm bek a kiteel hi,” a ci hi.

Sisarʼ Tungah Siah Piakna

¹⁵ Tua ciangin Farisi mite paikhia uh a, a kampauna tawh Jesu a mat theih nadingun thu a kikum uh hi.

¹⁶ Amauʼ nungzuite le Herod mi pawl khat, Jesu kiangah a paisak uh hi. Amaute in, “Sia aw, thu ahi bang a gen tawntung na hihna thu ka thei uh hi. Mite kuamah zahtak tuam nei lo na hih manin midangteʼ pau ding bangmah phamawh sa loin Pasian in miteʼ gamtat ding a deihna bangin tangtakin thu na hilh tawntung hi.

¹⁷ Tua ahih ciangin Rom kumpipa Sisar tungah siah i piak ding kilawm hiam, na ngaihsutna nong gen nadingin ka deih uh hi,” a ci uh hi.

¹⁸ Ahi zongin Jesu in amauʼ gitloh geelna thei ahih manin, “Mihoih a kineihkhem mite aw, bang hangin kei hong thangsiah se na hi uh hiam?

¹⁹ Siahin na piak ding uh sum hong lak dih un,” a cih ciangin sumtang peek khat hong paipih uh hi.

²⁰ Tua ciangin Jesu in amaute kiangah, “Hih sum tungah kua lim le kua min om ahi hiam?” ci-in a dot ciangin

²¹ amaute in, “Sisarʼ lim le a min kigelh hi,” a ci uh hi. Tua ciangin Jesu in amaute kiangah, “Sisarʼ nate Sisarʼ tungah na pia unla, Pasianʼ nate Pasianʼ tungah na pia un,” a ci hi.

²² Amaute in hih thu a zak uh ciangin lamdang sa mahmah uh a, ama kiang panin a paikhia uh hi.

Thawhkikna Thu Dotna

²³ Tua ni mahin, misite thawhkikna om lo hi, ci-in a um Saddusi mite pawl khat Jesu kiangah hong pai uh a,

²⁴ “Sia aw, Moses in, ‘Mi khat ta nei loin a sih leh tua a si mipaʼ khang a kizop theih nadingin a naupa in a uʼ zi luah tahen,’ ci hi.

²⁵ Tu-in kote lakah unau pasal sagih omngei hi. A u pen in zi nei a, ta nei loin si ahih manin ama zi a naupa in a luah hi.

²⁶ Tua mah bangin a nihna, a thumna a kipan a sagihna dongin ta nei loin a si uh hi.

²⁷ Tua unau pasal sagihte a sih khit ciangin a numei zong a si hi.

²⁸ Tua ahih manin tua unau pasal sagihte in tua nu teenpih kim uh ahih manin, thawhkik hun ciangin a koi penʼ zi hi ding ahi hiam?” ci-in a dong uh hi.

²⁹ Ahi zongin Jesu in, “Note in Lai Siangtho thu ahi a, Pasianʼ vangliatna ahi zongin thei lo na hih manun na ngaihsun khial uh hi.

³⁰ Bang hang hiam cih leh misite a thawhkik uh ciangin vantungah a om vantung mite tawh kibang ding uh a, zi nei pasal nei cih om lo ding hi.

³¹ Misite thawhkikna thu tawh kisai-in note tungah a gen thute sim ngei lo na hi uh hiam?

³² Pasian in, ‘Kei pen Abrahamʼ Pasian, Isaacʼ Pasian, Jakobʼ Pasian ka hi hi,’ ci hi. Pasian pen a si miteʼ Pasian hi loin a nungta miteʼ Pasian ahi hi,” a ci hi.

³³ Mihonte in hih thu a zak uh ciangin ama thuhilhna hangin lamdang a sa uh hi.

Thukham Lian pen

³⁴ Ahi zongin Farisi mite in, Saddusi miteʼ thudotna Jesu in dongkhakin, Saddusi mite in a cih nading mel uh a theih nawn lohna thu a zak uh ciangin Jesu kiangah a hong pai uh hi.

³⁵ Amaute sung panin Thukham hilh siate khat in Jesu a thangsiahna-in thu hong dong a,

³⁶ “Sia aw, thukham khempeuh sung panin bang thukham lian pen ahi hiam?” ci-in a dong hi.

³⁷ Jesu in, “Na Topa Pasian na lungsim khempeuh, na nuntakna khempeuh le na pilna khempeuh tawh na it ding hi, cihna ahi hi.

³⁸ Hih pen a masa pen, a lian pen thukham ahi hi.

³⁹ A nihna pen a masa mah tawh kibang a, nangma pumpi na it bangin na veengte na it in, cihna ahi hi.

⁴⁰ Hih thukham nihte tung panin thukham dang khempeuh le kamsangteʼ thuhilhna khempeuh a hong meeng khia ahi hi,” ci-in a dawng hi.

Davidʼ Suan tawh kisai Thudotna

⁴¹ Tua bangin Farisi mite hong kikaihkhop laitakin Jesu in amaute kiangah,

⁴² “Note in Khris kua hi ci a, kuaʼ suan hi, ci-in ngaihsun na hi uh hiam?” ci-in a dong hi. Amaute in, “Davidʼ suan hi,” ci-in a dawng uh hi.

⁴³ Tua ciangin Jesu in amaute kiangah, “Tua ahihleh bang hangin David mahmah in Pasianʼ Khaʼ sawlna tawh,

⁴⁴ ‘Topa in keima Topa tungah thu gen a: Na galte, na khe nuai ah ka koih matengin ka tak lamah na tu in,’ ci hi, ci-in thu na gen a, Khris pen ka Topa ci ahi hiam?

⁴⁵ David in Khris pen Topa ci ahihleh bang hangin Khris pen Davidʼ suan hi thei ding ahi hiam?” ci-in thu a dong hi.

⁴⁶ Kuamah in ama thudotna kam khat beek dawng thei lo uh hi. Tua hun a kipanin kuamah in Jesu kiangah thu a dong ngam nawn kei uh hi.