Mattiu 11 - Tedim Bible Revision 2017

Tuiphumpa Johan Kiang Pan Kamtaite

¹ Jesu in a nungzui sawm le nihte a vaikhakna a man khit ciangin tua kiimnai-a om khuate ah thuhilh ding le thugen dingin tua mun panin a paikhia hi.

² Tuiphumpa Johan in thong sung panin Jesuʼ nasepnate a zak ciangin Jesu kiangah a nungzuite sawl a,

³ “Nang pen a hong pai ding pa na hi hiam, tua ahih kei leh a dang na lamen lai ding ka hi uh hiam?” ci-in a dongsak hi.

⁴ Jesu in amaute kiangah, “Va ciahkik unla, tu-a na zakte uh le na muh uh thute va gen un:

⁵ Mittawte in khua mukik a, khebaite pai theikikin, miphakte damkik a, bilngongte in khua za kikin, misite hingkik a, mizawngte tungah Lungdamna Thu a kihilhnate va gen un.

⁶ Kei hong umte pen a lungdamhuai mahmah ahi hi,” ci-in a dawng hi.

⁷ Tua thu dong mite a ciahkhiat khit ciangin Jesu in mihonte kiangah Johanʼ thu gen a, “Gamlak ah Johan kiangah na pai uh ciangin bang a mu dingin kilamen na hi uh hiam? Huih in a mut awn diamdiam lopa kungte a en ding maw?

⁸ Tua hi lo ahihleh bang a mu dingin kilamen na hi uh hiam? Puan hoih nono a silhpa a mu dingin kilamen maw? A taktakin ci lehang, puan hoih nono a silhte pen kumpi inn sungah om uh hi.

⁹ Tua ahih kei leh bang a en dingin pai na hi uh hiam? Kamsang pa a en ding maw? Hi hi; kamsang pa a en dingin na pai uh a, tua na muhpa uh kamsang mawkmawk ciang bek hi loin a lian zaw khat ahi hi.

¹⁰ Bang hang hiam cih leh Lai Siangtho in Johanʼ thu a genna ah, ‘Na pai nading lampi a hong khol dingin nangma mai ah ka kamtai pa ka sawl hi,’ ci-in Pasian in gen hi, ci-in kigelh hi.

¹¹ Leitung mi khempeuh sung pan Tuiphumpa Johan a lian pen ahi hi. Ahi zongin vantung ki-ukna sungah a neu pen i cihte nangawn Johan sangin lian zaw lai hi.

¹² Tuiphumpa Johanʼ thuhilh hun a kipan tu ciang dong, mite in vantung ki-ukna thu hong kituhteh gawp uh a, thahat thu hong ciam uh hi.

¹³ Bang hang hiam cih leh Tuiphumpa Johan thuhilh a kipat hun ciang dong, kamsangte khempeuh le Moses Thukham khempeuh in hih vantung ki-ukna thu gen belin a nei uh hi.

¹⁴ Tua thu kigen sa na up nop uh leh, a kigenkhol bangin a hong pai ding Elijah a kici pen Tuiphumpa Johan ahi hi.

¹⁵ Tua ahih manin bil neite in na za ta un.

¹⁶ “Ahi zongin tu hun mite bang tawh genteh ding ka hi hiam cih leh: Mihon omna lamkabom ah a tu naupang a kimawlte tawh kibang uh hi. Naupang hon khat in a lawmte kiangah,

¹⁷ ‘Lam nading khuang kong tumsak uh hangin na lam nuam kei uh a, kah la ka sak uh hangin lah na kap nuam tuan kei uh hi,’ a kicite tawh a kibang uh hi.

¹⁸ Bang hang hiam cih leh Tuiphumpa Johan hong pai a, amah in zu le an tangin a om ciangin, ‘Dawivei hi,’ a ci uh hi.

¹⁹ Mihing Tapa hong pai leuleu a, zune anne-in a om ciangin, ‘Zuhai anhai pa; siahdongte le midangte in a kikholh pih nop loh mite tawh a kikhawl pa,’ ci leuleu uh hi. Ahi zongin Pasianʼ pilna a man taktakna thu a gah panin hong kilang hi,” a ci hi.

A Kisik lo Khuapiteʼ Thuak Ding Gimnate

²⁰ Tua ciangin Jesu in nalamdang tampi a bawlna mun khuapi mite kisik nuam lo uh ahih manin taii bawl ding kipan a,

²¹ “Khorazin khuapi mite le Bethsaida khuapi mite aw, gimna lianpi na thuak ding uh hi. Bang hang hiam cih leh note khua sungah a hong kilak nalamdangte, Taia le Sidon khua sungah kilak hileh amaute in kisikna limin sawtpekin puanhampi silhin vut kinuh ding uh hi.

²² Tua ahih manin thukhen ni ciangin noteʼ thuakna sangin, Taia le Sidon khua miteʼ thuakna baih zaw lai ding ahihna thu phawk ta un.

²³ Kapernaum khuapi mite aw, van a sangna munah hong kipahtawi ding sa na hi uh hiam? Hell khuk sungah hong kilawnsuk ding hi. Bang hang hiam cih leh noteʼ khua sunga hong kibawl nalamdangte, Sodom khua sungah kibawl hileh tu ni dongin tua khua kip lai ding hi.

²⁴ Tua ahih manin thukhen ni ciangin noteʼ thuakna sangin Sodom khua miteʼ thuakna baih zaw lai ding ahihna thu phawk ta un,” a ci hi.

Ka Kiangah Hong Pai-in Tawldam Un

²⁵ Tua ciangin Jesu in, “Vantung le leitung Topa ahi ka Pa aw, mipilte le misiamte tungah na ip hih thute, bangmah a thei lo hih mite tungah lak na hih manin ka nuam hi.

²⁶ Pa aw, hih pen nangma deihna le na lungkimna bangin na hih ahi hi.

²⁷ “Ka Pa in kei tungah na khempeuh hong pia khin hi. Pa sim loh Tapa a thei kuamah om lo a, Tapa le Tapa in a theihsak nop mite sim loh, pa a thei kuamah om lo hi.

²⁸ “Na semin van gik pua-in a gim mite khempeuh aw, ka kiangah hong pai ta un. Note tungah lungsim tawldamna kong pia ding hi.

²⁹ Keima hakkol zamin kisuan unla, kei kiangah hong kisin dih un. Kei pen kiniamkhiatin nem hithiat ka hih manin ka kiangah na tawl uh a dam ding hi.

³⁰ Bang hang hiam cih leh note kong suat ding ka hakkol nuam a, na puak ding uh van zong a zang mah ahi hi,” ci-in a gen khia hi.