Marka 6 - Tedim Bible Revision 2017

Nazareth khua ah Jesu Kisang lo

¹ Tua lai panin ama khua Nazareth ah Jesu pai a, a nungzuite in a zui uh hi.

² A Sabbath ni ciangin kikhopna inn ah thu a hilh hi. Ama thuhilh a za mi tampite in lamdang sa-in, “Hih pa in hih thute koi panin a ngah ahi hiam? Hih pa tungah a kipia pilna a bang pilna ahi hiam? Bangci-in nalamdang hici bawl theih ahi hiam?

³ Amah khutsiam pa hi lel a, Mary’ tapa hi lo ahi hiam? James, Josef, Judas le Simon-teʼ u hi lo ahi hiam? A nau numeite zong hih lai mah a om hi lo ahi uh hiam?” a ci uh hi. Tua hi a, amah sang zo lo uh hi.

⁴ Tua ciangin Jesu in amaute kiangah, “Kamsang khat pen, ama khua, ama behte le ama inn sung longal ah kizahtakin pahtawina a ngah hi,” a ci hi.

⁵ Tua hi a, cina tawmkhatte tungah khut nga-in a damsak cih sim loh, tua lai ah nalamdang lian bawl thei lo hi.

⁶ Amaute in amah a up loh manin lamdang a sa mahmah hi. Tua ciangin tua kiim a om khuaneute ah thuhilhin a pai kawikawi hi.

Sawm le nihte A Kisawlna

⁷ Jesu in sawm le nihte sam a, amaute tungah dawi hawlkhiat nading vangliatna pia-in, amaute nih nihin a sawl khia hi.

⁸ Amaute kiangah, “Ciangkhut sim loh, na khualzinna uh ah bangmah keng kei un. An ahi a, ip ahi a, sum ahi zongin keng kei un.

⁹ Khedap bulh unla, ahi zongin puanak nih silh thuah kei un.

¹⁰ A zin dingin a hong deih inn khat peuhpeuh ah tung unla, tua khua panin na paikhiat mateng uh tua inn mahah om paisuak un.

¹¹ Na paina uh khua khatpeuh in note hong sang loin, na thuhilhna uh hong ngaih nop kei uh leh, tua khua nusia-in, na khe uh a leivui baangte sinsan un. Tua pen amaute adingin hilhkholhna ahi hi,” ci-in a vaikhak hi.

¹² Tua ahih ciangin amaute kuan khia uh a, mite a mawhna panun a kisik nadingun thu a hilh uh hi.

¹³ Dawi tampi hawl khia uh a, cina mi tampi sathau zutin a damsak uh hi.

Tuiphumpa Johan A Sihna

¹⁴ Kumpi Herod in Jesu thu a kigengenna thu a za hi. Mi pawl khat in, “Tuiphumpa Johan, sihna panin hingkik hi. Tua ahih manin hih vangliatnate nei hi,” a ci uh hi.

¹⁵ Ahi zongin a dangte in, “Elijah hi,” ci uh a, pawl khat leuleu in, “Tanglai-a kamsangte mah bangin kamsang khat hi,” a ci uh hi.

¹⁶ Herod in Jesuʼ nasepnate a zak ciangin, “A lutang ka tan khiatsak Johan hong hingkik hi,” a ci hi.

^17-18 Bang hang hiam cih leh Herod in a nau Filip’ zi Herodias a tenpihna hangin Johan in Herod kiangah, “Na naupaʼ zi na teenpih ding ngeina hi lo hi,” ci-in gen zelzel ahih manin Herodias a heh suak a, galkapte in Johan manin thong sungah a khiat nadingin Herod a vaihawmsak hi.

¹⁹ Tua ahih manin Herodias in Johan mudahin that nuam a, ahi zongin that zo lo hi.

²⁰ Bang hang hiam cih leh Johan pen a thuman mihoih khat hi, ci-in Herod in ngaihsun ahih manin amah zahtakin siatna a thuak nading panin hu hi. Ama thugente in a lungsim nuam losak hi; ahi zongin a thugen za nuam veve hi.

²¹ Ahi zongin a tawpna ah Herodias in hunhoih ngah hi. Herod a suah ni hun a tun ciangin kumpi uliante, galkap maangte le Galilee gam sunga om ulian khempeuh adingin pawi a kham hi.

²² Tua pawi bawlna sungah Herodiasʼ tanu hong pai-in hong laam a, Herod le a leenglate khempeuh lungdam mahmah uh hi. Tua ahih ciangin kumpipa in, “Bang deih na hiam; na deih peuhpeuh kong pia ding hi,” a ci hi.

²³ Amah in kamciam pia a, “Ka kumpi gam phel khat ciang dong nangawnin, nong nget peuhpeuh kong piak nading kong kiciam hi,” a ci hi.

²⁴ Tua ahih ciangin tua numeino va pai khia-in a nu kiangah, “Bang ngen ding ka hi hiam?” ci-in a va dong hi. A nu in, “Tuiphumpa Johanʼ lutang ngen in,” ci-in a dawng hi.

²⁵ Numeino zong kumpipa kiangah hong paikik pahin, “Kuangdai khat sungah Tuiphumpa Johanʼ lutang nong piak pah ding ka deih hi,” a va ci hi.

²⁶ Hih thu a zak ciangin kumpipa dah mahmah hi. Ahi zongin a kiciamnasa hang le a leenglateʼ maitang a zahtakna hangin nial ngam lo hi.

²⁷ Tua ahih ciangin Johanʼ lutang a hong paipih nadingin galkapte khat a sawl pah hi. Amah zong pai-in thong sungah Johanʼ lutang tan khia a,

²⁸ kuangdai khat sungah a lutang hong paipihin numeino tungah a pia hi.

²⁹ Johanʼ nungzuite in hih thu a zak uh ciangin hong pai-in a luanghawm la uh a, hanah a vui uh hi.

Tul Nga Vakna

³⁰ Tua khit ciangin Jesu kiangah sawltakte hong ciahkik uh a, a sepna khempeuh uh le a thuhilhna khempeuh uh a zasak uh hi.

³¹ Mi a ciah leh a kuan kiphamat uh ahih manin Jesu le a nungzuite in annek nading hun nangawn nei man lo uh hi. Tua ahih manin Jesu in, “Ei guak i om theih nading mun khat ah paikhia ni; tua lai ah na tawlnga thei ding uh hi,” a ci hi.

³² Tua ahih ciangin gunkuang tuangin gamdaihna mun a zuan dingin a pai uh hi.

³³ Ahi zongin a paikhiat lam uh le amaute ahih lam uh, mi tampi in thei uh ahih manin khuapi khempeuh panin a hong pai mite, lei lam tawnin na pai uh a, Jesu le a nungzuite a tun ma-in a na ma tun uh hi.

³⁴ Jesu, tui gei a tun ciangin mi tampi a na om khin mu a, amaute, a cing om lo tuute tawh kibang sa ahih manin a khasiat mahmah hi. Tua hi a, amaute thu tampi tak a hilh hi.

³⁵ Nitak lam ciangin a nungzuite in Jesu kiangah, “Tu-in nitak hi ta a, hih lai mun lah gamlak ahi hi.

³⁶ Hih kiim a om khuate ah amaute pai-in a annek ding uh a lei nadingun hih mihonte sawl khia in,” a ci uh hi.

³⁷ Ahi zongin Jesu in, “Amauteʼ nek ding bang khat peuhpeuh pia un,” a ci hi. A nungzuite in, “Ngun peek za nih tawh anlum va lei-in amauteʼ nek dingin pia ding ka hi uh hiam?” ci-in a dong uh hi.

³⁸ Tua ciangin Jesu in, “Anlum bangzah nei na hi uh hiam, va en dih un,” a ci hi. Amaute in, “Anlum nga le ngasa tawn nih om hi,” ci-in a hong genkik uh hi.

³⁹ Tua ciangin Jesu in, “Mihonte a pawl a pawlin khen unla, lopa hing tungah tusak un,” a ci hi.

⁴⁰ Tua ahih manin mihonte zong pawl khat ah za, pawl khat ah sawm nga, cih bangin a honhonin a gual tut uh hi.

⁴¹ Tua ciangin Jesu in a anlum nga le a ngasa tawn nihte la a, vantung lam en to-in Pasian tungah lungdamna a ko hi. A anlumte balnen a, mite tungah a piak dingin nungzuite a pia hi. Tua mah bangin ngasa tawn nihte zong amaute khempeuh a hawmsak hi.

⁴² Amaute khempeuh in ne-in a kham uh hi.

⁴³ Tua ciangin nungzuite in a kikhamval anlum le ngasa khawm uh a, paipel sawm le nih a dim hi.

⁴⁴ Tua an a ne mi sung panin pasal cingteng tul nga a pha hi.

Jesu, Tui Tungah Pai

⁴⁵ Tua khit phetin Jesu in a nungzuite gunkuang ah tuangsakin, a gal khat a om Bethsaida khua ah ma paisak a, amah in mihonte a khua ciatah a ciah dingin a sawl hi.

⁴⁶ Amaute tawh a kikhen khit ciangin thungen dingin mual tungah a kah to hi.

⁴⁷ Khuamial ciangin tui laizang dong gunkuang tung ta a, Jesu ahihleh leitungah amah guakin om lai hi.

⁴⁸ Huih in a nungzuite lehmut ahih manin gunkuang hot zo loin haksa a sakna thu uh Jesu in a thei hi. Tua hi a, zingsang lam nai thum pan nai guk kikal khawngin a nungzuite kiang lamah tui tung tawnin Jesu a pai hi. Amaute a kheng suak ding bangin pai a,

⁴⁹ ahi zongin a nungzuite in tui tung a mi pai a muh ciangun, “Sikha hi,” ci-in ngaihsun uh ahih manin a awngkek gawp uh hi.

⁵⁰ Bang hang hiam cih leh amah a muh uh ciangin lau mahmah uh hi. Ahih hangin Jesu in thakhatin amaute hopih pah a, “Lungnuamin om un. Keimah ka hi hi; lau kei un,” a ci hi.

⁵¹ Tua ciangin amaute omna gunkuang tungah Jesu kah to a, huihpi zong a dai pah hi. Nungzuite in lamdang a sa mahmah uh hi.

⁵² Bang hang hiam cih leh lungsim navak lo uh ahih manin anlum tawh kisai thupiang tel thei lo uh hi.

Gennesaret gamah Jesu in Cina Damsak

⁵³ Tui a kantan khit uh ciangin Gennesaret gam tung uh a, tui gei ah a gunkuang uh a khih uh hi.

⁵⁴ Gunkuang panin a paikhiat khit phetun mite in Jesu ahih lam a thei pah uh hi.

⁵⁵ Tua gam sung tengah mite tai kawikawi uh a, Jesu om hi, ci-in a kigenna mun peuhpeuh ah cinate a lupna pheek uh tawh hong pua uh hi.

⁵⁶ Khuapi, khua neu le khua kete a a paina khempeuh ah, mite in mihon kikhopna munah cinate hong pua uh a, a puan mongteep beek a lawnsak nading deihin Jesu kiangah a thum uh hi. A puan mongteep a lawng kha mi khempeuh cidam pahpah uh hi.