Marka 5 - Tedim Bible Revision 2017

Gadara khuami Dawivei pa Kidamsak

¹ Tua ciangin Jesu le a nungzuite Galilee Tuili gal khat, Gadara miteʼ gam sung a tung uh hi.

² Gunkuang tung panin Jesu a kum suk khit phetin, han lak panin a hong pai mi khat in na dawntuah hi.

³ Hih mipa dawivei hi a, han lakah a teeng hi. Kuamah in hih mipa, sikkhau tawh hen zo nawn lo uh hi.

⁴ Tam veipi tak, a khut le a khe, sikkhau tawh kihen khin ngei a, ahi zongin a kihen simin a sikkhaute botsatin, a khe-a kibulh kolte a sukham gawp hi. Amah hat lua ahih manin kuamah in hih zo lo hi.

⁵ Sun le zanin han lak le mual tung tengah vak kawikawi a, awng gawpin, suang hiamte tawh amah a kikui liam hi.

⁶ Hih mipa in Jesu a gal muh ciangin hong delhin ama mai ah khukdin a,

⁷ nakpi takin kiko-in, “A Lianpen Pasianʼ Tapa Jesu aw, kei bang hong nuammawh na hi hiam? Kei, gim hong pia kei in, ci-in Pasianʼ min tawh kong thum hi,” a ci hi.

⁸ (Hih bangin a cihna pen, Jesu in, “Dawi aw, hih mipa sung panin paikhia in,” a cihna hang ahi hi.)

⁹ Jesu in, “Na min bang ahi hiam?” ci-in a dong hi. Mipa in, “Kote tampi pha ka hih manun ka min pen A Honpi ahi hi,” ci-in a dawng hi.

¹⁰ Tua gam panin mun dangah dawite a hawlkhiat loh nadingin tua mipa in a thum lailai hi.

¹¹ Tua laitakin tua nai-a om mualpang ah vok hon tampi gamta-in a om hi.

¹² Dawite in, “Hua vokte kiang beek ah hong paisak inla, a sungah hong tumsak in,” ci-in a thum uh hi.

¹³ Tua ahih manin Jesu in dawite a pai nading uh thu pia a, dawite zong mipa sung panin pai khia-in vokte sungah a lut uh hi. Tua vok honpite a vekpi-in tul nih bang pha hi. Mual tung panin tai suk henhan uh a, tuili sung kidenna-in tui kia mang khin uh hi.

¹⁴ Tua ciangin tua vokcingte tai-in khua sung le gam sung tengah hih thupiang a gen uh hi. Tua thupiangte a en dingin mite zong hong pai uh hi.

¹⁵ Jesu kiang a tun uh ciangin dawi tampi a vei ngei mipa zong a mu uh hi. Tua mipa hoihtakin om a, a lungsim pilin, puan silhin a om a muh uh ciangin lamdang sa-in lau mahmah uh hi.

¹⁶ Hih thupiang a mu mi khempeuh in dawivei pa tunga thupiang le vokte thu, mi khempeuh kiangah a gen kawikawi uh hi.

¹⁷ Tua ahih ciangin amau gam panin a paikhiat nadingin mipite in Jesu a sawl khia uh hi.

¹⁸ Tua lai panin gunkuang tungah Jesu a kah tohkik ciangin dawi a vei ngei mipa in, “Kei zong hong zuisak in,” ci-in a thum hi.

¹⁹ Ahi zongin Jesu in amah zuisak lo a, “Na innkuanpihte kiangah ciahkik inla, Topa in nang a hong hehpihna le nangma tunga a hong bawlnate va gen in,” ci-in a sawl zaw hi.

²⁰ Tua ahih ciangin a mipa ciah a, tua kiim a om Khuapi Sawmte sungah, Jesu in ama adingin a sepnate gen a, tua thu a za mi khempeuh in lamdang a sa uh hi.

Jairasʼ Tanu le Jesuʼ Puan A Lawng Numei

²¹ Jesu, gunkuang tuangin a gal kah khit ciangin, tuili gei ama kiangah mi tampi tak hong kikhawm leuleu uh hi.

²² Tua laitakin kikhopna inn a uk, Jairas a kici mi khat hong pai a, Jesu a muh ciangin a khe phung ah bokin,

²³ “Ka tanu si dektak ta hi. Amah a cidam kikin a nuntak theih nadingin hong pai inla, ama tungah na khut hong ngaksak in,” ci-in a thum hi.

²⁴ Jesu zong, tua mipa tawh a paikhia khawm hi. Mi tampi tak in zong zui uh ahih manin Jesu a nehcip uh hi.

²⁵ Tuate lakah, kum sawm le kum nih sung tawntung siluang natna a nei numei khat a om hi.

²⁶ Siavuan tampi in amah bawl a, a sum neih khempeuh zang khin napi-in noptuam zaw loin gim semsem zaw hi.

²⁷ Tua numei in Jesuʼ thu za ahih manin mihonte kawmah Jesuʼ nung a zui hi.

²⁸ Tua nu in, “A puan mong nangawn va lawng kha leng, dam ning,” ci-in a ngaihsun hi.

²⁹ A va lawn khit phetin a siluang khawl pah a, ama sunga a natna a damlam a kiphawk hi.

³⁰ Jesu in ama sung panin a vangliatna a paikhiat lam phawk pah ahih manin mihonpite lakah khuadakin, “Kua in ka puan hong lawng na hi uh hiam?” a ci hi.

³¹ A nungzuite in, “Mihonpite in nang hong nehcih lam na thei hi. Bang hangin kua in hong lawng na hi uh hiam, ci mawk na hi hiam?” a ci uh hi.

³² Ahi zongin amah a lawngte a theih nadingin Jesu khuadak kawikawi lai hi.

³³ Tua numei in ama tunga thupiang thei ahih manin laukawm liingkawmin hong pai-in a khe phung ah hong bok a, a thupiang khempeuh ahi bangbangin a hong gen hi.

³⁴ Jesu in zong tua nu kiangah, “Ka tanu aw, na upna in nang hong damsak zo hi. Cidam suak inla, lungnuam takin va ciah in,” a ci hi.

³⁵ Tua laitakin kikhopna inn ukpaʼ inn panin kamtaite hong tung uh a, “Na tanu si khinta hi. Bang hangin Siapa mawk gimsak nawn ding na hi hiam?” a ci uh hi.

³⁶ Ahi zongin Jesu in amau thu kigen don loin kikhopna inn ukpa kiangah, “Lunghimawh kei in; upna nei peuh in,” a ci hi.

³⁷ Tua lai panin Jesu in Peter le James le a nau Johan longal kuamah dang kizuisak nawn lo hi.

³⁸ Kikhopna inn ukpaʼ inn a tun uh ciangin miteʼ kahna le thumna, a gamlumna uh a mu hi.

³⁹ Amah sung tumin, “Bang hangin hici gamlum na hi uh hiam? Bang hangin kap na hi uh hiam? Numeino a si hi lo hi; a ihmu hi bek hi,” a ci hi.

⁴⁰ Amaute in Jesu zahpih bawlin nuihsan uh ahih manin Jesu in amaute khempeuh pusuaksak a, numeinoʼ pa le a nu le a nungzui thumte tawh, numeinoʼ lupna inn dei ah a pai uh hi.

⁴¹ Tua ciangin numeinoʼ khut lenin, “Numeino aw, tho in,” a cihna, “Talitha kumi,” a ci hi.

⁴² Numeino zong thakhatin tho-in lam a pai pah hi. (Amah kum sawm le kum nih pha ta hi.) Tua ciangin amaute in lamdang sa mahmah uh hi.

⁴³ Hih thu, kuama kiangah a gen loh nadingun Jesu in nakpi takin amaute kham a, tua ciangin, “Numeino an pia un,” ci-in a sawl hi.