Marka 11 - Tedim Bible Revision 2017

Gualzawhna tawh Jerusalem-a Lutna

¹ Jerusalem khuanai, Bethfage le Bethany khuaneute a omna Oliv Mual a tun uh ciangin Jesu in a nungzuite nih ma sawl a,

² “Mai-a om khua ah va pai un. Khua na tun phetun, kuamah a tuan ngei nai lohna la no khat khau a kikhih na mu ding uh hi. Hong sut unla hong kai un.

³ Mi khatpeuh in, ‘Bang hangin tua la khau sut na hi uh hiam?’ hong cih leh, ‘Topa in deih hi; hih lai mahah kong kaikik pah ding uh hi,’ ci-in gen un,” a ci hi.

⁴ Amau tegel zong pai pah uh a, kongzing a kong gei khat ah la no a kikhih khat mu uh ahih manin a khau a sut pah uh hi.

⁵ Tua kiim a om mite in, “Bang hangin tua la no khau sut na hi uh hiam?” ci-in a dot uh ciangin,

⁶ Jesuʼ vaikhak thu teng gen uh a, bangmah cih nawn lo uh hi.

⁷ Jesu kiangah a la no tunpih uh a, a la no tungah a puan uh phahin a tungah Jesu a tuang hi.

⁸ Mi tampite in ama pai nading lampi ah a puan uh na phah uh a, mi pawl khat in lo lai panin a sat uh sawlpangte na phah uh hi.

⁹ Jesuʼ mai-a a pai mite le a nung a a zui mite in, “Pasian phat un! Topaʼ tangin a hong pai mipa, Pasian in thupha pia tahen!

¹⁰ A hong tung ding i pu Davidʼ ukna, Pasian in thupha pia tahen! Pasian phat un!” ci-in a awng uh hi.

¹¹ Tua bangin Jerusalem khua sungah Jesu lut a, biakinn sungah pai-in na khempeuh a en kawikawi hi. Tua ciangin ni niam khinta ahih manin sawm le nihte tawh Bethany khua ah a pai hi.

Theikung A Kisamsiatna

¹² A zing ciangin Bethany khua pan paikhia uh a, Jesu a gil a kial hi.

¹³ A teh a no theikung khat gal muh ahih manin a gah khak leh ci-in a lo dingin a va pai hi. Thei min hun hi lo ahih manin, a phung a tun ciangin a teh sim loh bangmah na om lo hi.

¹⁴ Tua ciangin theikung kiangah, “Nang tung panin kuamah in theigah loin ne nawn kei tahen,” a ci hi. Hih thu, a nungzuite in a za uh hi.

Biakinn Siansakna

¹⁵ Jerusalem khua a tun uh ciangin, biakinn huang sungah Jesu lutin tua sungah sumzuak sumlei a a omte hawlkhiat ding kipan a, sumkhekteʼ sabuaite lumlet sakin, vakhu zuakteʼ tutphahte sawn paihsak hi.

¹⁶ Biakinn huang sungah kuamah bangmah paipihsak lo hi.

¹⁷ Tua ciangin mite kiangah thu hilh a, “Ka inn pen mi khempeuh adingin thungetna inn kici ding hi,” ci-in Pasian in a genna thu Lai Siangtho sungah kigelh hi lo ahi hiam? Ahi zongin note in guta buluhteʼ bukna mun na suaksak uh hi, ci-in thu a hilh hi.

¹⁸ Siampi liante le Thukham hilh siate in hih thu a zak uh ciangin Jesu a thah theih nading uh lampi a zong uh hi. Ahi zongin mihonpi in ama thuhilhna lamdang sa uh ahih manin amaute in Jesu a kihta uh hi.

¹⁹ A nitak ciangin khuapi panin Jesu le a nungzuite a paikhia uh hi.

Theikung Si Pan Thuhilhna

²⁰ A zingsang ciangin tua lampi mah zui-in a paikik ciangun tua theikung a zung dongin a sihna a mu uh hi.

²¹ Peter in a thu phawk ahih manin, “Sia aw, na theikung samsiat a sita hi,” a ci hi.

²² Jesu in amaute kiangah, “Upna nei un.

²³ Upna na neih nak uh leh hih mual kiangah, ‘Na omna panin pai khia-in tuipi sung kidenna in,’ ci le-uhcin, na lungsim sung uh ah uplahna om loin na gen bangun piang taktak ding hi, ci-in na up nak uh leh, na cih bangun hong piang ding hi.

²⁴ Tua ahih manin note kiangah kong genin ah: Na khat peuhpeuh na nget uh ciangin ngah ding ci-in um un; tua hileh na nget peuhpeuh uh na ngah ding uh hi.

²⁵ Thungen dingin na din uh ciangin midang tungah na hehna uh a om khat peuhpeuh maisak un; tua hileh vantungah a om na Pa un noteʼ mawhna hong maisak ding hi.

²⁶ (Midangteʼ mawhna na maisak kei uh leh vantungah a om na Pa un noteʼ mawhna zong hong maisak lo ding hi,” ci-in a dawng hi.)

Jesuʼ Aana Neihna Kidong

²⁷ Tua ciangin Jerusalem tungkik leuleu uh hi. Biakinn kiimah Jesu a vak kawikawi laitakin siampi liante, Thukham hilh siate le upate hong pai uh a,

²⁸ “Hih nate, kuaʼ thu tawh bawl a, na bawl nadingin kua in aana hong pia ahi hiam?” ci-in a dot uh ciangin

²⁹ Jesu in, “Keimah in note tungah thu khat kong dong masa ding hi; nong dawn uh leh kei zong kua thu tawh ka bawl, cih kong gen ding hi.

³⁰ Johan in tui a phum theih nading thu Pasian kiang panin a ngah ahi hiam, ahih kei leh mihingte tung panin a ngah ahi hiam, hong gen un,” a ci hi.

³¹ Tua ciangin amaute khatlekhat kikum uh a, “Pasian kiang pan hi,” ci lehang, “Tua ahihleh bang hangin Johanʼ thu um lo na hi uh hiam?” hong ci dinga,

³² “Mihingteʼ tung pan hi,” cih ding lah, mi khempeuh in Johan pen kamsang taktakin ngaihsun uh ahih manin mite i kihta zel hi, a ci uh hi.

³³ Tua ahih ciangin, “Ka thei kei uh hi,” ci-in a dawng uh hi. Jesu in zong, “Hih nate kua thu tawh ka bawl cih thu kei zong kong gen kei ding hi,” a ci hi.