Mangmuhna 6 - Tedim Bible Revision 2017

Ciaptehnate

¹ Tua ciangin Tuuno in tua ciaptehna sagih sung panin khat a honkhiat ka mu hi. Tua laitakin ganhing lite sung panin khat in vanging bangin nakpi takin, “Hong pai in,” a cihna ka za hi.

² Ka khuadak leh sakol kang khat hong pai a, a tungah a tuang pa in thal khat a tawi hi. Ama tungah lukhu khat kipia a, a gualzo pa hihna tawh a gualzo dingin a kuan khia hi.

³ Ciaptehna a nihna a hon ciangin ganhing a nihna in, “Hong pai in,” a cihna ka za hi.

⁴ Sakol a ausan khat hong pai a, mite khatlekhat a kithah theih nadingun a sakol tung tuang pa in leitungah gal kidona a piansak theih nading vangliatna kipia a, ama tungah namsau lian mahmah khat zong kipia lai hi.

⁵ Ciaptehna a thumna a hon ciangin ganhing a thumna in, “Hong pai in,” a cihna ka za hi. Sakol vom khat hong pai ka mu a, a tungah a tuang pa in a khut ah tawitehna a tawi hi.

⁶ Tua ganhing lite lak panin awging bang khat ka za a, “Mangbuh lawhta khat in ni khat tha man a, mangbuhham lawhta thum in ni khat tha mah man hi. Ahi zongin oliv huan le leenggui huan susia kei in,” a ci hi.

⁷ Ciaptehna a lina a hon ciangin ganhing a lina in, “Hong pai in,” a cihna ka za hi.

⁸ Ka khuadak leh sakol puang khat ka mu a, a tungah a tuang paʼ min pen Sihna hi a, a nungah Hell in a zui hi. Amaute in namsau, kialpi, pulnatna le gamsate tawh leitung mi seh li suah seh khat a thah theih nadingun thu a kipia hi.

⁹ Ciaptehna ngana a hon ciangin Pasianʼ thu a genna hang le Pasianʼ thu citakin teci a panna uh hangin a kithat miteʼ kha, biakna tau nuai ah a om ka mu hi.

¹⁰ Amaute nakpi takin kiko uh a, “A thuman, a siangtho, a Vanglian Topa aw, leitungah a om lai, kote a hong that mite tungah cik ciangin thu khenin, kote hong thahna hangin cik ciangin phu la ding na hi hiam?” a ci uh hi.

¹¹ Tua ciangin amaute tungah puan tualpi a kang khat ciat kipia a, amaute a kithah mah bangin a kithat lai ding a naseppihte uh le a sanggamte uh a kim matengin tawl khat sung a tawlngak lai nading uh kigen hi.

¹² Ciaptehna gukna a hon ciangin ka khuadak le nakpi takin zin hong liing a, ni pen puan vom bangin hong vomin, kha pen sisan bangin a hong san hi.

¹³ Aksite ahihleh huihpi in theipuam a mutkhiat bangin van panin kia zaizai uh hi.

¹⁴ Laidal a kizial bangin vanpi kizialin maimang a, mual le tuikulhte khempeuh a omna uh panin maimang ta hi.

¹⁵ Tua ciangin leitung kumpite le mi liante, galkap maangte, mihaute le mi vangliante, silate le sila ahi lote a kipanin a kuamah peuh, mual tunga leihawmte sungah bu uh a,

¹⁶ mualte le suangtum lianpite kiangah, “Kote tungah hong kia suk unla, tokhom tungah a tupaʼ maitang le Tuunoʼ hehna panin kote hong liah un.

¹⁷ Amauteʼ hehna hangin gimna hun hong tung ta ahih manin kua in thuak zo ding ahi hiam?” a ci uh hi.