Mangmuhna 19 - Tedim Bible Revision 2017

¹ Tua khit ciangin vantungah mihonpi a kikona awging tawh a kibang khat ka za a, “Pasian phat un! Hotkhiatna, minthanna le vangliatna pen eiteʼ Pasian-aʼ ahi hi.

² A thukhennate thumanin thutang a, a paktatna tawh leitung mi khempeuh a siasak, a paktat nu tungah thu khen khinta a, ama nasemte a thahsakna hangin ama tungah a phu la khinta hi,” a ci uh hi.

³ Tua ciangin khatvei kikokik leuleu uh a, “Pasian phat un! Tua khuapi a katna khu tatsat loin van lamah khu to tawntung hi,” a ci uh hi.

⁴ Tua ciangin upa sawm nih le lite le ganhing lite in tokhom tungah a tu Pasian mai ah kunin bia uh a, “Amen! Pasian phat un!” a ci uh hi.

⁵ Tua ciangin tokhom panin aw khat hong ging a, “Amah a kihta a lian a neu mite, le ama nasem khempeuhte aw, eiteʼ Pasian phat un,” a ci hi.

Tuunoʼ Zi neihna Pawi

⁶ Tua ciangin tuizeu ging le vanging tawh a kibang mihonpi kikona awging bang khat ka za a, “A Vanglian eiteʼ Topa Pasian kumpi suak khin ahih manin Pasian phat un.

⁷ Tuunoʼ zi neih ding hun hong tung ta a, a Lawmnu a kithawi sa-in om khin ahih manin lungdam kipakin amah phat ni.

⁸ Puan hoih mahmah, siangin a pak mahmahte, ama silh dingin kipia hi,” a ci uh hi. Tua puan hoih pen Pasianʼ mi siangthoteʼ gamtatna mante ahi hi.

⁹ Tua ciangin vantungmi in keima kiangah, “Hih thu gelh in: Tuunoʼ zi neihna pawi ah a kisam mite a hampha mahmah ahi hi,” hong cih khit ciangin, “Hihte pen Pasianʼ gen taktak kammal ahi hi,” hong ci thuah lai hi.

¹⁰ Tua ciangin amah a bia dingin a khe phung ah ka kun suk a, ahi zongin amah in, “Kei hong bia kei in. Kei pen Jesuʼ hong thugente a lenkip nang le na sanggamte khempeuh tawh nasem khawm khat ka hi hi. Pasian bia in!” hong ci hi. Jesuʼ thugen in kamsang nasep sepnop nading lungsim a guan ahi hi.

Sakol Kang tungah A Tuang pa

¹¹ Tua ciangin vantung a kihong ka mu a, sakol kang khat a om hi. A tungah a tuang pa pen a Citak a Thuman pa kici hi. Amah in thumanin thu khenin gal a do hi.

¹² A mittangte meikuang tawh kibang a, lukhu tampi a khu hi. Amah sim loh kuamah dang in a theih loh min khat ama tungah a kigelh hi.

¹³ Sisan sungah a kidiah puan tualpi khat silh a, amah pen, “Pasianʼ Thu,” cihna min tawh a kisam hi.

¹⁴ Vantung galkapte a siangtho puan pak hoih tawh kizem uh a, sakol kangte tungah tuangin amah a zui uh hi.

¹⁵ Minam dangte a zawh gawp nading namsau hiam khat a kam sung panin a pusuak hi. Amah in sik ciangkhut tawh minam dangte ukin, a Vanglian Pasianʼ heh mahmahna tawh leenggah cilna ah leengtui a suk khia ding hi.

¹⁶ A puan tung le a phei tungah, “Kumpiteʼ Kumpi, topateʼ Topa,” ci-in a min kigelh hi.

¹⁷ Tua ciangin ni sungah vantungmi khat a ding ka mu a, amah in vankim lai ah a leeng vasa khempeuh nakpi takin samin, “Pasianʼ pawi lianpi ah a kikhawm dingin hong pai un.

¹⁸ Hong pai unla, kumpiteʼ sa, galkap maangte le galkapteʼ sa, sakolte le a tungah a tuangteʼ sa, a lian a neu, silate le sila ahi lo mi khempeuhteʼ sa hong ne un,” a ci hi.

¹⁹ Tua ciangin sakol tungah a tuang pa le a galkapte a sim dingin ganhing le leitung kumpite a galkapte uh tawh a kikaikhawm ka mu hi.

²⁰ Tua ciangin a ganhing le tua ganhing omna ah nalamdang a bawl kamsang zuau pa kiman khawm hi. Ganhing ciaptehna a neite le ganhing lim a biate pen tua nalamdangte tawh a kikhem ahi hi. Ganhing le kamsang zuau pa, a nihun kat kikhulna meiphual pi sungah a hingtangun kilawn hi.

²¹ Sakol tungah a tuang paʼ kam panin a hong pusuak namsau in amauteʼ galkap khempeuh that lum khin a, vasate khempeuh in a nek zawh zahzahun amauteʼ sa a ne uh hi.