Mangmuhna 16 - Tedim Bible Revision 2017

Pasianʼ Hehna A Dim Haite

¹ Tua ciangin biakinn panin awging khat in vantungmi sagihte kiangah, “Leitungah va pai unla, hai sungah a om Pasianʼ hehnate va sung khia un,” ci-in awging lianpi tawh a genna ka za hi.

² Tua ahih manin a khatna vantungmi va pai-in leitungah hai va bung a, a tungah ganhing ciaptehna a neite le a lim a bia mite tungah a kihhuai meima a na mahmah hong piang hi.

³ A nihna vantungmi in tuipi tungah a hai hong bung a, tuipi tuite misiteʼ sisan tawh kibang hong suak ahih manin tuipi sungah a om nuntakna a nei khempeuh a si hi.

⁴ A thumna vantungmi in gunte le tuinakte tungah a hai hong bung a, a tui khempeuh sisan a hong suak hi.

⁵ Tua ciangin tuite a uk vantungmi in, “A beisa hun a kipanin tu hun dongin a om a Siangtho Pa aw, hih bangin na thukhenna ah nang na thuman hi.

⁶ Amaute in mi siangthote le kamsangteʼ sisan luangsak uh ahih manin tu-in amauteʼ dawn dingin sisan a pia na hi hi. Hih pen amauteʼ ngah dingin a kilawm ahi hi,” a cihna thu ka za hi.

⁷ Tua ciangin biakna tau panin aw khat hong ging a, “A Vanglian Topa Pasian aw, na thukhennate thumanin thutang hi,” a cihna ka za hi.

⁸ A lina vantungmi in ni tungah a hai hong bung a, ni in a satna tawh mite a kaang gawp hi.

⁹ Nisa in mite kaang gawp ahih manin mite in hih gimna tawh kisai ah thu a nei Pasian a samsia uh hi. Ahi zongin a mawhna uh panin kisikin Pasian a phat ding uh ut lo uh hi.

¹⁰ A ngana vantungmi in ganhing tokhom tungah a hai hong bung a, tua ganhingʼ ukna gam sung tengah khua hong mial hi. Mite in na a sak manun a leii pet uh a,

¹¹ a meimate uh na a sak manun vantung Pasian a samsia uh hi. Ahi zongin a gamtat siatna uh panin kisik nuam lo uh hi.

¹² A gukna vantungmi in Eufratis Gun lianpi tungah a hai hong bung a, nisuahna lam kumpite hong pai nading lam a bawl kholhna-in a tuite hong kangcip hi.

¹³ Tua ciangin gulpi kam sung, ganhing kam sung le a man lo kamsang paʼ kam sung panin uiphuk tawh a kibang kha gilo thum a hong pusuak ka mu hi.

¹⁴ Tuate pen dawiteʼ kha hi a, nalamdang a bawl uh hi. A Vanglian Pasianʼ Ni hong tun ciangin gal a do dingin leitung gam khempeuh ah a om kumpite a kaikhawm dingin a kuan khia uh hi.

¹⁵ (“Na ngai un! Guta bangin kei ka hong pai hi. Mihon lakah guaktangin pai-in maizumna a ngah khak loh nadingun a puante uh kemin, pilvang khua phawkin a om mite a hampha ahi uh hi.”)

¹⁶ Tua khate in Hebru pau-in Armageddon a kici munah kumpite a kaikhawm uh hi.

¹⁷ A sagihna vantungmi in huih lakah a hai hong bung a, biakinn sung tokhom panin nakpi takin aw khat hong gingin, “Man khinta hi,” a ci hi.

¹⁸ Tua ciangin khua hong phia-in, a ging lianpi hong om a, van hong gingin nakpi takin zin hong liing hi. Zin liing khempeuh lakah a husia pen ahih manin mihing a pian zawh hih bang zin liing omngei nai lo hi.

¹⁹ Khuapi phel thum kisuah a, gam sunga om khuapi dang khempeuh kisia hi. Pasian in Babylon khuapi mangngilh lo a, ama hehna ahi leenggahzu a hai sung panin Babylon khuapi a dawnsak hi.

²⁰ Tuikulh khempeuh mangthang a, mual khempeuh maimang hi.

²¹ Gial gol pipi, khat ciangin tawi sawm thum val a gik, van panin mite tungah hong kia hi. Tua gimna nasia lua ahih manin tua gialte hangin mite in Pasian a samsia uh hi.