Mangmuhna 15 - Tedim Bible Revision 2017

Vantung mite le A Nunung Gimnate

¹ Tua ciangin vanah nalamdang lian mahmah khat ka mu hi. Gimna nam sagih a hong keng vantungmi sagih om uh a, Pasianʼ hehna a lah tawpna uh ahih manin a nunung pente ahi uh hi.

² Tua ciangin mei tawh a kihel limlang peekpi kiphah tuipi tawh a kibang ka mu hi. Ganhing, a lim le a min nambat tawh a kipia sa a zote, Pasianʼ lasakna harpte tawi-in tuipi tawh a kibang gei ah a ding uh hi.

³ Amaute in Pasianʼ nasem Moses la le Tuuno la sa uh a, “A Vanglian Topa Pasian aw, na nasepnate lamdangin lian mahmah hi. Khang tawntung a Kumpipa aw, na nasepnate ah thumanin na thutang hi.

⁴ Topa aw, nang, kua in hong kihta lo dinga, na liatna hong phat lo ding ahi hiam? Nang bek na siangtho hi. Thumanin na sepnate mi khempeuh in mu uh ahih manin minam khempeuh nang kiangah hong pai-in, na mai ah hong bia ding uh hi,” a ci uh hi.

⁵ Tua khit ciangin ka khuadak leh a sungah Pasianʼ Ompihna Mun a om vantung biakinn a kihong ka mu hi.

⁶ Tua biakinn sung panin vantungmi sagih, gimna sagih tawh hong pusuak uh a, puan pak silhin, kham awmgak tawh a awm uh a gak uh hi.

⁷ Ganhing lite sung panin khat in a nungta tawntung Pasianʼ hehna a dim hai sagih, vantungmi sagihte kiangah a pia hi.

⁸ Tua biakinn sungah Pasianʼ minthanna le a vangliatna khu kidim ahih manin, vantungmi sagihte in hong paipih gimna sagih a ven matengin biakinn sungah kuamah lut thei lo uh hi.