Mangmuhna 14 - Tedim Bible Revision 2017

Mi 144,000 teʼ Lasakna

¹ Tua ciangin ka khuadak leh Zion Mual tungah Tuuno adingin a om ka mu hi. Amah tawh mi tul za le tul sawm li le tul li ding khawm uh a, tua miteʼ taltang ah Tuuno le a paʼ min kigelh hi.

² Tua laitakin tuizeu lianpi le vanging tawh a kibang a gingpha mahmah aw khat vantung panin a hong ging ka za hi. Tua awging pen harp lasakna a kitum a ging tawh kibang hi.

³ Tokhom, ganhing lite le upateʼ lam nga-in tua mihonpite in la thak khat a sa uh hi. Tua la pen leitungah a kitan khia sa mi tul za le tul sawm li le tul lite sim loh kuamah dang in sa thei lo uh hi.

⁴ Hih mite in numei tawh paktatna gamta ngei nai lo uh a, paubaanna a nei lote ahi uh hi. Amaute in Tuuno a paina peuhpeuh ah zui uh a, midang khempeuh sung panin a kitan khia sa, Pasian le Tuuno tungah a kipia masa mite ahi uh hi.

⁵ Amaute, paubaanna om kiuhkeuh lo uh ahih manin zuau thu gen ngei het lo uh hi.

Vantungmi Thumteʼ Thugen

⁶ Tua ciangin leitungah a teeng mi namkim, pau namkim a zang mite tungah a tawntungin Lungdam nading Thu gen ding a nei vantungmi khat vankim lai ah a leeng ka mu hi.

⁷ Amah nakpi takin kiko a, “Amah in mihingte thu a khen ding hun hong tung ta ahih manin Pasian kihta unla amah phat un. Vanlelei, tuinak le tuipite a bawlpa hong bia ta un,” a ci hi.

⁸ Tua ciangin vantungmi a nihna in hong zui a, “A Lian Babylon khuapi kicim, kicim! Amah a huk a lanna leenggahzu, mi khempeuh tungah pia-in khamsak a, gimna thuaksak hi,” a ci hi.

⁹ Tua ciangin vantungmi a thumna in a masa tegel hong zui leuleu-in nakpi takin, “Tua ganhing le a lim bia-in a taltang ahih kei leh a khut tungah ciaptehna a ngah mi peuhmah in,

¹⁰ Pasianʼ leenggahzu zong dawn ding uh hi. Pasian in ama hehna ahi leenggahzu khauh pen ama hehna hai sungah a dimtakin sung khinzo ta hi. Tua bang mite pen a siangtho vantung mite le Tuuno mai ah meikuang le kat khu tawh gimna kipia ding hi.

¹¹ Amaute a kibawlsiatna mei, khu tawntung a, ganhing le a lim bia-in, a min kigelhna a nei mi peuhmah in a sun a zanin tatsat loin gimna thuak paisuak uh hi,” a ci hi.

¹² Pasianʼ thupiakna zui-in Jesu tungah a citak Pasianʼ mite adingin thuak zawhna kisam hi.

¹³ Tua ciangin vantung panin awging khat ka za a, “Tu a kipanin Topa thu ah a si mite mi hampha mahmah ahi hi, cihna gelh in,” a ci hi. Tua ciangin Kha Siangtho in, “Hi takpi hi. Amauteʼ nasepna thaman in amaute zui ding ahih manin a nasep gimna panun tawlnga-in nuamsa-in om ding uh hi,” ci-in a dawng hi.

Leitung Mite Anlak bangin A Kilakna

¹⁴ Tua ciangin ka khuadak leh meiipi a bang a kang biakbuak om a, tua meiipi tungah mihing tawh a kibang khat tu-in, kham lukhu khu-in, a khut ah phiaukawi hiam khat a tawi ka mu hi.

¹⁵ Biakinn sung panin vantungmi khat hong paikhia a, meiipi tungah a tu mipa nakpi takin samin, “Leitung mite lak dingin min mahmah a, a lak hun hong tung ta ahih manin na phiaukawi tawh at in,” a ci hi.

¹⁶ Tua ahih manin meii tungah a tupa in leitungah a phiaukawi hong van a, leitung mite a at hi.

¹⁷ Tua ciangin vantung biakinn panin vantungmi a dang khat hong paikhia leuleu a, amah in zong phiaukawi hiam khat mah a tawi hi.

¹⁸ Tua ciangin biakna tau panin vantungmi a dang khat hong paikhia leuleu hi. Tua vantungmi pen mei a ukpa hi a, phiaukawi hiam a tawipa kiangah nakpi takin, “Leitung mite leenggah bangin min ta ahih manin leitung mite na phiaukawi tawh atin a lomlomin kaikhawm in,” a ci hi.

¹⁹ Tua ahih manin vantungmi in zong leitungah a phiaukawi hong van a, leitung mite kaikhawmin Pasianʼ hehna lian leenggah cilna phualah a kaikhawm hi.

²⁰ Khuapi pua lamah kicil a, a cilna panin sisan vive luang khia-in, pi nga bang thukin, tai za nih ciang bangah tuikhang bangin a luang hi.