Malakhi 4 - Tedim Bible Revision 2017

Topaʼ Ni Hong Tung Ding

¹ Vanglian Topa in hih bangin ci hi: “En un, mi kiphasak khempeuh le migilo khempeuh, a zung a hiang cih om loin buhtu bangin a kattum ding hun hong tung ding hi. Tua ni ciangin khat zong suakta loin a vekpi-in kaang tum khin ding uh hi.

² Ahi zongin ka thu a hong mang note tungah dikna ni hong taang ding a, tua in nizang bangin note tungah cidamna hong tun ding hi. Bawng khumna panin a kikhah bawngnote bangin suakta-in nuam na sa ding uh hi.

³ Keimah in na kong sep ni ciangin note in migilote nuaisiahin leivui bangin na tuancil ding uh hi.

⁴ “Israel mite khempeuh in a zuih dingin Horeb Mual panin ka nasem Moses tungah ka piak ahi, Mosesʼ thukhamte, ngeinate le biakna ngeina kipte khempeuh limtakin phawk un.

⁵ “Ahi zongin tua a lauhuai lian mahmah Topaʼ ni hong tun ma-in note kiangah kamsang Elijah kong paisak ding hi.

⁶ Amah in pate le tate lemtuah in a kilemsakkik ding hi. Tua bang hikeileh keimah hong pai-in na gam khempeuh uh ka susia gawp ding hi,” ci hi, a ci hi.