Malakhi 2 - Tedim Bible Revision 2017

¹ Vanglian Topa in hih bangin ci hi: “Siampite aw, note adingin hih lai ah thupiakna khat om hi.

² Na gamtatna uh tawh kei nong zahtak ding uh hi. Ka thugente ngai loin, thupi takin na lak kei uh leh note tungah samsiatna ka hong tungsak dinga, siampi hihna tawh na ngah uh thuphate tungah samsiatna ka tungsak ding hi. A taktakin ci lehang, note in ka thupiaknate thupi lak lo na hih manun na thupha ngahte uh tungah samsiatna ka tungsak zo hi.

³ Na suanlekhakte uh nakpi takin ka thuhilh dinga, note na hih uh leh, na biakpiakna ganhing uh a ekte tawh na maitang uh hong zut gawpin tuate tawh kong lawn khia khawm ding hi.

⁴ Tua ciangin Leviʼ suanlekhakte ahi siampite tawh ka thuciamna a kip nawn lo ahihna thu, hih thu kong genna ah na thei ding uh hi.

⁵ “Amaute a nuntakna ding le a nopsakna ding thu ka ciam a, amaute in kei hong zahtak theih nadingun hih ka thuciamte khempeuh ka pia hi. Amaute in kei hong zahtakin hong kihta takpi uh hi.

⁶ Amaute in thuman taktakte mah hilhin gen uh a, amauteʼ kam panin zuau thu ging khia lo hi. Ka deihna bangin amaute gamta uh a, a khial ding mi tampite, thuman lamah a paisak uh hi.

⁷ Siampiteʼ nasep pen Pasian a manin theih nading a hilh ding uh ahi hi. Amaute pen, Vanglian Topaʼ kamtaite ahih manun, mite in keima deihna a theih nadingun amauteʼ tungah thu a dot ding uh ahi hi.

⁸ “Ahi zongin, no siampite na hih uh leh lampi man panin na pial khin uh hi. Na thuhilhnate un mi tampi tak khialsak hi. Note tawh ka bawl thuciamna na palsat khin uh hi.

⁹ Tua ahih manin, note in ka thuhilhna zui loin, keima thu na hilh uh ciangin zong a kibangin hilh loin mi na deidan mah uh bangin, kei zong mi khempeuh mai ah simmawhna le niamkhiatna kong ngahsak ding hi,” a ci hi.

Israel-teʼ Cihtak lohna Kitai

¹⁰ Eite khempeuh in, eite a hong piangsak Pasian ahi Pa khat bek nei hi lo ihi hiam? Tua hi napi-in bang hangin eite khatlekhat tungah citak loin, Pasian in i pu i pate tawh a bawl thuciamna palsat ihi hiam?

¹¹ Judah mite citak loin, Pasian tungah a thuciamna uh palsat uh a, Israel miteʼ lak le Jerusalem khua sungah siatna tampi gamta uh hi. Topa in a it mahmah biakinn ninsak uh hi. Topa ahi lo, pasian dang a bia numeite, zi-in la-in a teenpih uh hi.

¹² Hih bangin a gamta mi peuhmah, a kua a kua hitaleh, Topa in su gawp henla, Vanglian Topa tungah biakna a paipih ei minamte tawh hong kigawmsak nawn kei hen.

¹³ Noteʼ gamtatna a dang khat om lai hi. Tua pen, noteʼ paipih biaknate hong sang nawn lo ahih manin Topaʼ biakna tau, khitui tawh na kawtsak uh a, kapin thumin na om uh hi.

¹⁴ Bang hangin hong sang lo hiam, na ci uh hi. Na khangno lai uh a na teenpih na zite uh tungah na cihtak lohna uh amah in hong thei a, na zite uh tungah na cihtak tawntungna ding uh Pasian tungah thu ciamin, na zite uh zong na lawmnu mah uh hi napi-in amaute tawh na thuciamna uh na pelhna hang uh ahi hi.

¹⁵ Pasian in na zite uh tawh pum khat, lungsim khat ahi dingin hong bawl hi lo ahi hiam? Hih bangin a hong bawlna pen bang a deihna ahi hiam? Pasianʼ mi taktak ahi ding tate i neih theih nading ahi hi. Tua ahih manin na khangno lai-un na teenpih na zi uh tawh na thuciamna uh na palsat khak loh nadingun kidawm un.

¹⁶ Vanglian Topa in hih bangin ci hi: “Zi makna ka deih kei a, mi khatpeuh in a khangno lai-a a teenpih a zi tungah tua bang gitlohna a gamtatna ka mudah hi. Tua ahih ciangin hoihtakin kidawm unla, a citak dingin na zite uh tungah na thuciamna uh palsat kei un,” ci hi, a ci hi.

Thukhen Ni Ding Hong Nai

¹⁷ Thu na gengenna uh tawh Topa na gimsak uh hi. Note in, “Bangci gimsak ka hi uh hiam?” na ci uh hi. “Topa in a sia-in a gamtate a hoihin ngaihsun a, zong itin amaute tungah lungkim takpi hi,” na cihna khawng uh le, “Thutang a gen Pasian koi lai ah om ahi hiam?” ci-in na dotnate uh tawh na gimsak uh hi.