Luka 24 - Tedim Bible Revision 2017

Thawhkikna

¹ Nipi ni zingsang tungin numeite in a bawl sa uh paknamtui tawi-in hanah va pai uh hi.

² Han phual a tun uh ciangin hankhuk hukna suang a kilik khia mu uh ahih manin

³ a sungah tum pah uh a, ahi zongin Topa Jesuʼ luang na om lo hi.

⁴ Amaute in lamdang sa-in a om laitakun amaute gei ah puan pak a silh mi nih hong ding vat uh hi.

⁵ Numeite lau mahmah uh ahih manin lei lam nga-in kuncip uh hi. Tua mi nihte in, “Bang hangin misite lakah mihing zong na hi uh hiam?

⁶ Hih lai ah om nawn lo hi; kithosak zo hi. Galilee gamah a om lai-in note kiangah thu hong genin,

⁷ ‘Mawhnei miteʼ khut sungah Mihing Tapa kipia dinga, singlamteh tungah kithatin, a ni thum ni-in hingkik ding hi,’ a cih thute phawk un,” a ci uh hi.

⁸ Tua ciangin amaute in Jesuʼ thugente phawkkik uh a,

⁹ han panin ciahkikin, nungzui sawm le khatte le midangte kiangah hih thute a gen uh hi.

¹⁰ Sawltakte kiangah hih thu a gen numeite pen Magdala khuami Mary, Joanna, Jamesʼ nu Mary le numei dangte ahi uh hi.

¹¹ Ahi zongin hih numeiteʼ thugen pen thu phuahtawm bangin ngaihsun uh a, um lo uh hi.

¹² Ahi zongin Peter dingin hanah va tai a, han sung a et suk ciangin a kitunna puan bek na om hi. Tua ciangin amah in zong tua thupiang lamdang sa-in inn ah a ciahkik hi.

Emmaus Khua ah Paina

¹³ Tua ni mahin, Jesuʼ thu a zui mi nih, Jerusalem khua panin tai sagih bang a gamla Emmaus kici khua ah a pai uh hi.

¹⁴ A paikawmun hih thupiangte kikumkum uh hi.

¹⁵ Tua bangin kiho-in thu kikumin a om laitakun Jesu mahmah in hong naihin amaute tawh hong tonkhawm hi.

¹⁶ Amau tegel in a muh hangun Jesu ahih lam thei lo uh hi.

¹⁷ Jesu in, “Na lam paikawmun bang gengen na hi uh hiam?” ci-in a dong hi. Amau tegel zong din khawl pah uh a, a maisuah uh dahmai mahmah lai hi.

¹⁸ Tua ciangin amau tegel sung panin Kleopas a kici pa in, “Jerusalem-a hawhte lakah tu sawng teng a tua lai-a thupiang a thei lo nang bek na hi ding hi,” ci-in a dawng hi.

¹⁹ Tua ciangin Jesu in amaute kiangah, “Bang thu ahi hiam?” ci-in a dot ciangin amaute in, “Nazareth khuami Jesu tunga thupiang ahi hi. Amah pen kamsang khat hi a, Pasian le mite khempeuh in a thugen le a nasepna ah vang a nei mahmah khatin a ngaihsut uh ahi hi.

²⁰ Ahi zongin ka siampi liante uh le ka uliante un sihna thukhenna a thuak dingin Pilat tungah ap uh a, singlamteh tungah kithat hi.

²¹ Amah pen Israel mite a hon khia ding pa hi, ci-in ka lamet uh ahi hi. Tua bang hi napi-in hih thu teng hong piang a, tu-in a thu pian zawh a ni thumna hi ta hi.

²² Ko pawlteʼ sung panin numei pawl khat in lamdang ka sak uh thu hong gen uh hi. Amaute, tu zingsang tungin hanah va pai uh a,

²³ ahi zongin ama luang na om nawn lo hi. Tua ciangin amaute hong ciahkik uh a, vantung mite a muhna uh le tua vantung mite in Jesu a hinkik khitna thu a gennate uh hong gen sawn uh hi.

²⁴ Tua ciangin ka lawmte uh pawl khat zong hanah va pai uh a, numeiteʼ gen bang teekteekin va mu uh a, ahi zongin Jesu mu lo uh hi,” ci-in a dawng hi.

²⁵ Tua ciangin Jesu in amau tegel kiangah, “Bangzah takin hai a, bang dingin kamsangteʼ thugen um thei lo na hi uh hiam?

²⁶ Khris in minthanna a ngah nadingin hih bang teng a thuak ding kisam hi lo ahi hiam?” a ci hi.

²⁷ Tua ciangin Jesu in Lai Siangtho sungah ama thu a kigennate khempeuh, Moses laibu a kipanin kamsangteʼ laibu khempeuh a khiatna a gen hi.

²⁸ Tua khua a tun uh ciangin Jesu a paisuak ding bangin hong om a,

²⁹ ahi zongin amau tegel in kho-in, “Tu-in nitak lam hi ta a, ni tum dektak ahih manin ko tawh hong tam khawm in,” a ci uh hi. Tua ahih manin Jesu zong amaute tawh a tam hi.

³⁰ Amaute tawh an ne dingin a tut ciangin Jesu in anlum la a, Pasian tungah lungdamna a koh khit ciangin balnenin amaute a pia hi.

³¹ Tua laitakin a hak tawm bangin Jesu ahih lamtak mu-in thei uh a, ahi zongin amauʼ muhna panin Jesu a mang pah hi.

³² Amau tegel in, “Lampi ah i pai kawmin Lai Siangtho khiatna hong gen laitakin i lungsim hong lawpsak mahmah hi mah lo ahi hiam?” a kici uh hi.

³³ Amau zong thakhatin ding pahin Jerusalem ah paikik uh a, nungzui sawm le khatte le a dangte na kikhawmin,

³⁴ “Topa hingkik khin takpi hi. Simon kiangah na kilak khinzo hi,” ci-in a kigengen laitak uh a tuak uh hi.

³⁵ Tua ciangin tua mi nihte in zong a lam pai laitak uh a thupiang teng le anlum a balnen ciangin Topa ahih lamtak a theihnate uh a gen uh hi.

Jesu, A Nungzuite kiangah Kilang

³⁶ Amaute hih thu kikumin a om laitakun thakhat thu-in Jesu mahmah amaute lakah hong dinga, “Nopna ngah ta un,” ci-in amaute a hopih hi.

³⁷ Ahi zongin amaute lau-in liing lawng gawp uh a, sikha a mu hi ni, ci-in a ngaihsun uh hi.

³⁸ Tua ciangin Jesu in amaute kiangah, “Bang hangin lungmang a, bang hangin lungka na hi uh hiam?

³⁹ Ka khut le ka khete en un; kei mahmah ka hi hi. Hong lawng unla hong thei un. Tu-a keima neih bangin sikha in pum le tak nei ahi hiam?” a cih khit ciangin

⁴⁰ a khut le a khete a lak hi.

⁴¹ Amaute nuam lua kisa-in lamdang sa-in um zo lo phialin a om laitakun, “Nek theih khat peuhpeuh na nei uh hiam?” ci-in a dot ciangin

⁴² amaute in zong ngasa haankeu khat pia uh a,

⁴³ Jesu in saangin amauteʼ muhin a ne hi.

⁴⁴ Tua ciangin Jesu in amaute kiangah, “Tu-a thupiang khempeuh pen note tawh kong om khawm lai-a ka gengen thute mah ahi hi. Moses Thukham laibu sung, kamsangte laibu sung le Late sungah a kigelh thu khempeuh a tung ding ahi hi,” a ci hi.

⁴⁵ Tua ciangin Lai Siangtho sung thu a theih nadingun a lungsim uh honsak a,

⁴⁶ amaute kiangah, “Khris in sihna thuakin, a ni thum ni-in sihna panin hingkik dinga,

⁴⁷ Jerusalem khua a kipan minam khempeuh tungah a mawhna uh kisikin a kimaisak nading thu, ama min tawh kihilh ding hi, ci-in kigelh hi.

⁴⁸ Note pen hih thu khempeuh a thei teci na hi uh hi.

⁴⁹ Ka Paʼ hong ciam sa thu, note tungah kong pia ding hi. Ahi zongin vantung panin tua vangliatna na ngah mateng uh hih Jerusalem khuapi ah na ngak un,” a ci hi.

Vankahna

⁵⁰ Tua ciangin Jerusalem khua sung panin Bethany khua gei ciang amaute paipih a, tua lai panin a khut laam to-in amaute thupha a pia hi.

⁵¹ Amaute thupha a piak laitakin amaute kiang panin pai khia-in vantungah amah a kila to hi.

⁵² Amaute in amah bia uh a, lungdam mahmah in Jerusalem khua ah a ciahkik uh hi.

⁵³ Tua ciangin Pasian tungah lungdamna a ko dingin biakinn ah a pai tawntung uh hi.