Luka 23 - Tedim Bible Revision 2017

Jesu, Pilat Mai ah

¹ Tua ciangin a vekpi-in ding khia uh a, Pilat mai ah a paipih uh hi.

² Tua lai panin amah mawh zon ding kipan uh a, “Hih mipa in ka mipihte uh lam khialsakin, kumpipa tungah siah piak loh dingin thu gen a, a mahmah zong Khris ahi kumpi khat ahihna a kigenna zong ka za uh hi,” a ci uh hi.

³ Tua ciangin Pilat in, “Nang, Jew miteʼ kumpipa na hi hiam?” ci-in a dot ciangin, “Nang zong tua mah nong ci hi,” ci-in a dawng hi.

⁴ Tua ciangin Pilat in siampi liante le mihonte kiangah, “Hih mipa mawhsak nading thu bangmah ka mu kei hi,” a ci hi.

⁵ Ahi zongin amaute in nawhsa takin nak pau semsem uh a, “Amah in mite a buai nadingin thu hilh a, Galilee gam pan hong kipanin Judea gam sung khempeuh ah hong hilh a, tu-in hih lai mun hong tung ta hi,” a ci uh hi.

Jesu, Herod Mai ah

⁶ Pilat in hih thu a zak ciangin, “Hih mipa Galilee mi ahi hiam?” ci-in a dong hi.

⁷ Jesu pen Herodʼ ukna sung mi ahih lam a theih ciangin, tua laitakin Herod mah zong Jerusalem ah om ahih manin ama kiangah a paisak hi.

⁸ Herod in Jesuʼ thu zaza a, amah a muhnop sawt mahmah khinta ahih manin Jesu a muh ciangin a nuam mahmah hi. Jesu in nalamdang a bawlte a mu dingin kilamen hi.

⁹ Tua ahih manin Herod in thu tampi tak dong a, ahi zongin Jesu in kam khat beek dawng lo hi.

¹⁰ Siampi liante le Thukham hilh siate in hong neh uh a, Jesu mawhsakna thu nakpi takin hong gen uh hi.

¹¹ Tua ciangin Herod le galkapte in Jesu zahko-in simmawh bawl uh a, kumpi puan tualpi a silhsak khit uh ciangin Pilat kiangah a puakkik uh hi.

¹² Hih hun ma-in Herod le Pilat kilem loin kigal bawl uh a, ahi zongin tua ni mahmah in amau tegel kilem kikin kipawl bawl uh hi.

Jesu a Si dingin Thu Kikhen

¹³ Pilat in zong siampi liante, upate le mihonpite sam khawmin,

¹⁴ amaute kiangah, “Hih mipa in i mipihte lam khialsak hi, ci-in mawhsakin kei kiangah nong paipih uh hi. Note khempeuh mai mahah amah thu ka sit a, amah na mawhsakna uh thute khat beek ah a mawhna ka mu kei hi.

¹⁵ Tua mah bangin Herod in zong ama mawhna mu lo a, eite kiangah amah hong puakkik hi. Hih mipa in sihna a thuak nadingin ama gamtatna bangmah om lo hi.

¹⁶ Tua ahih manin amah satna tawh thuhilhin ka khah ding hi,” a ci hi.

¹⁷ (Paisan Pawi hun simin Pilat in amauteʼ deih thong kia khat a khah ding ahi hi.)

¹⁸ Tua ciangin mihon khempeuh kiko uh a, “Amah that in! Barabbas hong khahsak in!” a ci uh hi.

¹⁹ Barabbas pen khua sungah mi a buaisakna hang le mi a thahna hangin thong sungah a kikhum ahi hi.

²⁰ Pilat in Jesu khah nuam ahih manin mihonpite tungah khatvei a genkik hi.

²¹ Ahi zongin mihonpite in, “Singlamteh tungah that in, singlamteh tungah that in,” ci-in a kiko uh hi.

²² Tua ciangin amaute tungah a thum veina thu gen a, “Amah in bang mawhna bawl ahi hiam? Sihna a thuak nadingin ama gamtatna bangmah ka mu kei hi. Tua ahih manin amah satin ka khah ding hi,” a ci hi.

²³ Ahi zongin a aw neihzah uh tawh amaute awng semsem uh a, singlamteh tungah Jesu a thah nading gen uh ahih manin a tawpna ah a zo uh hi.

²⁴ Tua ahih manin amauteʼ ngetna bangin piak dingin Pilat in thu a khen hi.

²⁵ Mi buaisakna le mi thahna hangin thong sungah a kikhia mipa amauʼ ngetna bangin khah a, amauʼ deihna bangin a bawl dingun Jesu a pia khia hi.

Singlamteh tungah Khaina

²⁶ Tua ciangin amaute in Jesu paikhiatpih uh a, gam sung panin khuapi sungah a hong pai, Sairin khuami Simon a kici mi khat tawh a kituak uh hi. Amaute in tua pa man pah uh a, a singlamteh suanin Jesuʼ nung zui-in a puasak uh hi.

²⁷ Jesuʼ nung zui-in mi tampi tak pai uh a, tuate lakah Jesu kahin a tamlawh numei pawl khat zong a kihel hi.

²⁸ Jesu zong amaute lamah kihei a, “Jerusalem khua numeite aw, kei hong kah kei unla, note le na tate uh adingin kap un.

²⁹ Bang hang hiam cih leh mite in, ‘Ta a nei ngei lo, naungek nawi a teepsak ngei lo numei ciingte mi hampha mahmah ahi hi,’ a cih hun hong tung ding hi.

³⁰ Tua hun hong tun ciangin mite in, ‘Mual lian mual neute in hong cipnelhin a si khin hi lehang ut zaw hang,’ ci ding uh hi.

³¹ Singkung hing bang ahi kei tungah hih bangin hong bawl uh ahihleh singkung keu bang ahi note tungah hong nak hih zaw kan ding uh hi lo ahi hiam?” a ci hi.

³² Mi that ahi, thong a kikhum mi nih zong, Jesu tawh thah khawm dingin a paipih uh hi.

³³ “Lutang Guh,” a kicihna mun a tun uh ciangin singlamteh tungah Jesu kilhcip uh a, tua mi that mi nihte zong, Jesuʼ tak lamah khat, a veilamah khat kilhcip uh hi.

³⁴ Ahi zongin Jesu in, “Pa aw, amaute in bang hih ihi hiam cih thei lo uh ahih manin a mawhna uh na maisak in,” a ci hi. Tua ciangin amauʼ ngah ding ciat a theih nadingun aisanin a puante a hawm uh hi.

³⁵ Jew mi upate in Jesu zahko-in, “Amah in midangte hon khia hi. Pasian teel sa Khris ahih takpi leh amah le amah kihon khia tahen,” ci-in a simmawh bawl laitakun tua lai-a ding mite in a enen uh hi.

³⁶ Galkapte in zong zahpih bawl uh a, a kiangah hong pai-in leenggahzu thuk pia uh a,

³⁷ “Jew Miteʼ Kumpipa na hih takpi leh nang le nang kihon khia in,” a ci uh hi.

³⁸ “Jew Miteʼ Kumpipa hi,” ci-in a kigelh lai zong ama tung sanah kisuang hi.

³⁹ Amah tawh a kikhai khawm mi that pa khat in zong Jesu zahko a, “Nang Khris hi lo na hi hiam? Nangmah kihon khia inla, tua ciangin kote zong hong hon khia in,” a ci hi.

⁴⁰ Ahi zongin a khat pa in a lawmpa taii a, “Pasian nangawn kihta lo na hi hiam? I vekpi-in gim hong kipiakna kibang kim hi.

⁴¹ Ei tegel pen i gamtatna tawh kizui-in thu hong kikhen ahih manin ahi ding mah ahi hi. Ahi zongin amah in khialhna bangmah nei lo hi,” a cih khit ciangin

⁴² Jesu kiangah, “Jesu aw, Kumpi-in nong pai ciangin kei zong hong phawk in,” a ci hi.

⁴³ Jesu in ama kiangah, “A mantakin keʼn kong cih in ah: Tu ni-in Paradais ah kei tawh na om khawm ding hi,” a ci hi.

Jesuʼ Sihna

⁴⁴ Tua hun laitak pen sunkim nai sawm le nih pawl hi a, ni mial ahih manin nitak lam nai thum ciang dong leitung khempeuh ah khua mial a,

⁴⁵ tua hun sungin biakinn sung dalna puan kikekin phel nih a suak hi.

⁴⁶ Tua ciangin nakpi takin Jesu kiko a, “Pa aw, nangma khut sungah keimah kong ki-ap hi,” a cih khit ciangin a si ta hi.

⁴⁷ Galkap mangpa in hih thupiang a muh ciangin Pasian phat a, “Hih pa, mihoih taktak khat ahi hi,” a ci hi.

⁴⁸ Hih thute a en dingin a hong pai mihonpite in a thupiang teng a muh uh ciangin dahin dip hum sa-in a ciah uh hi.

⁴⁹ Galilee gam panin Jesu a hong zui amah a thei ngei mite le numeite in gal et uh ahih manin a thupiang khempeuh a thei uh hi.

Jesu a Kivuina

^50-51 Tua laitakin Josef a kici mi khat om a, Judea gam sunga om Arimathea khuami ahi hi. Amah pen mihoih, a zahtakhuai mi khat hi a, Pasianʼ Uk ding hun lamenin a ngakngak mi khat ahi hi. Amah pen ulian thu vaihawm sunga kihel hi a, ahi zongin a lawmteʼ vaihawmna le a nasepnate uh thukimpih lo hi.

⁵² Hih mipa Pilat kiangah va pai-in Jesuʼ luang a ngen hi.

⁵³ Tua ciangin Jesuʼ luang la suk a, puan kang tawh a tun khit ciangin kuamah a kivui ngei nai lohna suang kikhuak hankhuk sungah a vui hi.

⁵⁴ Tua ni pen nipi zawh ni nga ni hi a, Sabbath ni hong hi dektak ta hi.

⁵⁵ Galilee gam panin a hong zui numeite in zong a kivuina ah zui uh ahih manin a han phual le a luang kisial zia khempeuh zong a mu uh hi.

⁵⁶ Tua ciangin amaute ciah uh a, Jesuʼ luang a nuh dingun paknamtui le sathau a bawl khol uh hi. Thukham zui-in Sabbath ni tawlnga-in a om uh hi.