Luka 1 - Tedim Bible Revision 2017

Theofilas tungah Apna

¹ A lian mahmah Theofilas aw: Eite lakah a piang ngeisa thu a kigente, mi tampi in amau siamna zah ciat tawh lai-in a gelh uh hi.

² A kipat cil a kipanin amauʼ mit mahmah tawh a mu mite in hong gente uh a gelh uh ahi hi.

³ Kei zong, hih thute khempeuh a kipat cil a kipanin limtakin kantel khin ka hih manin, a thu a kizomzomin nang adingin hong gelhsak leng hoih ding hi, ci-in ka ngaihsun hi.

⁴ Nang tungah a hong kigen sa thute khempeuh a man taktak na theih nading deihsakna tawh ka hong gelh ahi hi.

Tuiphumpa Johanʼ Suah nading Kigenkhol

⁵ Judea gam a hong uk sawn kumpi Herod hun laitakin siampi Abijahʼ pawlteʼ sung panin Zekhariah minnei siampi khat a om hi. A ziʼ min Elizabeth hi a, amah zong Aaronʼ suan ahih manin siampi nam mah ahi hi.

⁶ A nih tuakun Pasianʼ muhna ah a manin gamta uh a, Topaʼ thukhamte le a ngeina khempeuh a zui uh hi.

⁷ Ahi zongin Elizabeth ciing ahih manin amau nupa in ta nei lo uh a, a nih tuakun zong a teek ta uh ahi hi.

⁸ Ni khat, ama pawlteʼ sep hun ding a tun ciangin Zekhariah in Pasianʼ mai ah siampi nasep a sem hi.

⁹ Siampiteʼ hih ngei zel bangin biakna tau tungah, paknamtui kua in hal ding, ci-in ai a kisan ciangin Zekhariah in a ngah hi. Tua ahih manin Topaʼ biakinn sungah amah lut a,

¹⁰ amah in paknamtui halin a om laitakin mihonpi dangte a pua lamah thungenin na om uh hi.

¹¹ Tua laitakin Topaʼ vantungmi khat ama kiangah hong kilang a, paknamtui a kihalna biakna tau taklam pangah a ding hi.

¹² Zekhariah in vantungmi a muh ciangin lamdang sa mahmah a, a lau mahmah hi.

¹³ Ahi zongin vantungmi in ama kiangah, “Zekhariah aw, lau kei in. Pasian in na thungetna hong za khin a, na zi Elizabeth in tapa khat a nei ding hi. A min dingin Johan na phuak ding hi.

¹⁴ Amah hong suah ciangin nang na lungdam mahmah dinga, midang tampite in zong hong lungdam pih ding uh hi.

¹⁵ Topaʼ muhna ah amah mi lian khat hi ding hi. Amah in leenggahzu ahi a, khamtheih zu khat peuhpeuh ahi zongin ne lo ding hi. A suah phet a kipanin Kha Siangtho tawh kidim ding hi.

¹⁶ Amah in Israel mi tampi tak, amauʼ Topa Pasianʼ kiangah tunpihkik ding hi.

¹⁷ Amah pen kamsang Elijah mah bangin thahatna le vangliatna tawh Pasian mai ah hong mapai ding hi. Pate le tate kilemsakkikin, mihoihteʼ lungsim bang a neih nadingun thumang lo miteʼ lungsim heisak dinga, Topa adingin a kilawm dingin mite a bawl khol ding hi,” a ci hi.

¹⁸ Tua ciangin Zekhariah in vantungmi kiangah, “Hih na thugen a manna bangci theih ding ka hi hiam? Kei ka teek ta a, ka zi zong lah a teek mahmah ahi hi,” a cih ciangin

¹⁹ vantungmi in dawng a, “Kei pen Pasianʼ na a sem Gabriel ka hi hi. Nang kiangah thu hong genin, hih lungdamna thu a ko dingin a hong sawl ka hi hi.

²⁰ Ahi zongin, a hong tung ding ka thugen a hun lai-in um lo na hih manin nangma tunga kong thugen a tun matengin pau thei loin na om ding hi,” a ci hi.

²¹ Tua hun sungteng, mihonte in Zekhariah na ngak uh a, biakinn sungah sau veipi a om manin lamdang a sa uh hi.

²² Amah hong pusuah ciangin pau thei lo ahih manin, biakinn sungah maang mu hi, ci-in a thei uh hi. Pau thei lo ahih manin a khut tawh a lim a lak hi.

²³ Biakinn sungah ama nasep ding hun a bei ciangin a inn ah a ciah hi.

²⁴ Tua khit ciangin a zi Elizabeth gai a, kha nga sung inn panin koi mahah a paikhia kei hi.

²⁵ “Tu petpetin Topa in hih bangin kei hong huh a, mi lakah ka maizumna teng hong paih khiatsak ta hi,” a ci hi.

Jesuʼ Suah ding Kigenkhol

²⁶ Elizabeth a gai zawh kha guk a cin ciangin Pasian in Galilee gam Nazareth khua ah vantungmi Gabriel a paisak hi.

²⁷ Kumpi Davidʼ suan Josef in zuthawl a piak sa Mary tungah thu a gen dingin a sawl ahi hi.

²⁸ Vantungmi in Mary kiangah, “Na lungdam mahmah ding ahi hi. Topa in nang hong ompih a, thupha lianpi hong pia zo hi,” a ci hi.

²⁹ Mary in vantungmiʼ thugen a zak ciangin, bang a cihnopna hi ding ahi hiam, ci-in lamdang a sa mahmah hi.

³⁰ Tua ciangin vantungmi in, “Mary aw, lamdang sa-in lunghimawh kei in. Pasianʼ maipha a ngah na hi hi.

³¹ Nang gai-in tapa khat na nei dinga, a min dingin Jesu na phuak ding hi.

³² Amah mi lian hi dinga, A Lianpen Pasianʼ Tapa kici ding hi. Topa Pasian in ama pu David mah bangin kumpi-in bawl dinga,

³³ Jakob suanlekhakteʼ kumpi hi paisuak dinga, ama ukna bei hun cih omngei lo ding hi,” a ci hi.

³⁴ Tua ciangin Mary in vantungmi kiangah, “Kei, pasal tawh a lum khawm ngei nai lopi, hih thu bangci pian theih ding ahi hiam?” a ci hi.

³⁵ Vantungmi in, “Nangma tungah Kha Siangtho hong tung dinga, nangma tungah Pasianʼ vangliatna hong om ding hi. Tua ahih manin a hong suak ding a siangtho naungek pen Pasianʼ Tapa kici ding hi.

³⁶ Na beh nu Elizabeth zong thei in. A ciing hi, kici napi-in a teek mahmah zawh nungin naupaii a, tu-in a naupaii zawh kha guk pha ta hi.

³⁷ Tua ahih manin Pasian in a bawl theih loh khat zong om lo hi,” ci-in a dawng hi.

³⁸ Tua ciangin Mary in, “Kei pen Topaʼ nasem nu ka hi hi. Na gen sa bangin keima tungah hong piang tahen,” a ci hi. Tua ciangin ama kiang panin vantungmi a paikhia hi.

Elizabeth kiangah Mary Hawh

³⁹ Tua khit a sawt loin Mary kithawi a, Judea mual tung gam a khua khat ah a va pai pah hi.

⁴⁰ Zekhariahʼ inn ah lutin Elizabeth a hopih hi.

⁴¹ Elizabeth in Mary’ hopihna awging a zak ciangin a sunga a naupaii a hong diang hi. Elizabeth zong Kha Siangtho tawh hong kidim a,

⁴² nakpi takin kiko-in, “Numei khempeuh lakah thupha ngah pen nu na hi a, na neih ding naungek in thupha ngah ding hi.

⁴³ Ka Topaʼ nu kei kiangah hong hawh nadingin, bang hangin hih bang thu lian kei tungah hong tung ahi hiam?

⁴⁴ Bang hang hiam cih leh nong hopihna awging ka zak phetin ka sunga naungek nuamin a diang hi.

⁴⁵ Topa in nang tungah a hong gen thute hong tung taktak ding hi, ci-a upna pen nang adingin a lungdamhuai mahmah ahi hi,” a ci hi.

Mary’ Phatna La

⁴⁶ Tua ciangin Mary in, “Ka lungsim in Topa phat a,

⁴⁷ hong Hon Pasianʼ hangin ka nuam mahmah hi.

⁴⁸ Bang hang hiam cih leh a neu mahmah a nasem nu, keimah a hong phawk hi. Tu a kipanin a khangkhangin mi khempeuh in thupha ngah nu hong ci ding uh hi.

⁴⁹ Bang hang hiam cih leh Vanglian Pasian in keima adingin na lianpi hong sepsak hi. Ama min siangtho a,

⁵⁰ amah a zahtak mite tungah a khangkhangin hehpihna a lak hi.

⁵¹ Amah in a hat mahmah a khut zan a, kiliatsakna lungsim a nei mite a thehthang hi.

⁵² Kumpi vangliante, a tokhom panun khia suk a, mi neute, mi lianin a bawl hi.

⁵³ Bangmah a nei lote tungah na manpha tampi pia a, mihaute, khuthawm guakin a pai khiasak hi.

⁵⁴ I pu i pate tungah a kiciamna tungsak a, a nasem pa Israel a huh hi.

⁵⁵ Abraham le a suanlekhak khempeuh tungah hehpihna a piak tawntung ding a phawk hi,” a ci hi.

⁵⁶ Elizabeth kiangah kha thum sung bang Mary taam a, tua khit ciangin a inn ah a ciah hi.

Tuiphumpa Johanʼ Suahna

⁵⁷ Elizabeth a suah ding hun hong tung ta a, tapa khat hong nei hi.

⁵⁸ Topa in amah a hehpih mahmahna thu a zak uh ciangin a veengte le a behte khempeuh in a lungdam pih uh hi.

⁵⁹ Naungek nipikal khat a phak khit ciangin a vun a at dingin hong pai uh a, a naungekʼ min dingin zong a paʼ min mah ahi Zekhariah phuah ding a sawm uh hi.

⁶⁰ Ahi zongin a nu in, “Hi lo ding hi; ama min dingin Johan i phuak ding hi,” a ci hi.

⁶¹ Tua ciangin amaute in Elizabeth kiangah, “Na beh sung uh ah hih bang min a nei om nai lo hi,” a ci uh hi.

⁶² Tua ciangin hih nau min bang phuak ding ihi hiam, ci-in a pa kiangah lim tawh a dong uh hi.

⁶³ Zekhariah in zong laidal khat ngen a, tua tungah, “Ama min Johan hi ding hi,” ci-in a gelh ciangin amaute khempeuh in lamdang a sa mahmah uh hi.

⁶⁴ Tua laitakin Zekhariah hong pau theikik a, Pasian a phat hi.

⁶⁵ A veengte khempeuh in lamdang sa-in lau uh a, Judea mual tung gam sung khempeuh ah hih thu a kitheithang hi.

⁶⁶ Hih thu a za mi khempeuh in, “Hih naungek a bangci mi hong hi ding hiam?” ci-in a lungsim sung uh ah a ngaihsun ciat uh hi. Bang hang hiam cih leh Topa in amah a huhna thu teltakin kilang hi.

Zekhariahʼ Thugen

⁶⁷ Tua ciangin Johanʼ pa Zekhariah, Kha Siangtho tawh kidimin Pasianʼ thu gen a,

⁶⁸ “Israel miteʼ Topa Pasian phat ciat ni. A mite a huh dingin hong pai-in amaute a suaktasak hi.

⁶⁹ A nasem pa Davidʼ suante sung panin eite adingin Vanglian Honpa hong pia hi.

⁷⁰ Amah in tanglai-in a kamsang mi siangthote tungtawnin thu hong gen a,

⁷¹ i galte kiang panin hong hotkhiat nading le hong mudahteʼ khut sung panin hong hotkhiat nading thu a hong ciam hi.

⁷² I pu i pate a hehpih nading le ama thuciam siangtho hong mangngilh loh nading, amah in hong gen hi.

⁷³ I pu Abraham tungah kamciamna kho khat bawl a,

⁷⁴ i galte kiang panin eite hong hotkhiat nading le launa om loin amah bia-in,

⁷⁵ i khang tawnin ama mai ah a siangtho, a thumanin i om tawntung theih nading thu hong ciam hi.

⁷⁶ “Nang, ka tapa na hi a, Lianpen Pasianʼ kamsang pa hong kici ding hi. Ama pai nading lampi a bawl khol dingin Topaʼ mai ah na mapai ding hi.

⁷⁷ Na mawhna uh hong kimaisak khit ciangin, hotkhiatna na ngah ding uh hi, ci-in ama mite kiangah na gen ding hi.

⁷⁸ I Pasian lungnem mahmah a, hehpihna hong nei hi. Eite tungah hotkhiatna khuavak hong taangsak dinga,

⁷⁹ sih ding lauhuaina sungah a om mi khempeuh tungah vantung khuavak hong taangsak dinga, nopsakna lampi ah hong kha ding hi,” a ci hi.

⁸⁰ Tua naungek a pumpi le a lungsim siamna hong khang a, Israel mite lakah a kilaak hun matengin sehnel gam sungah a om hi.