Late 99 - Tedim Bible Revision 2017

Siangtho Pasian Phatna

¹ Topa in uk hi. Mihonte liing hen. Kherub-te tungah amah tu hi. Leitung liing tahen.

² Zion khuapi ah Topa lian a, amah in leitung mi khempeuh uk hi.

³ A lian a kihtakhuai ama min mi khempeuh in phat ta uh hen. Amah siangtho hi.

⁴ Thutang a deih, Vanglian Kumpipa aw, nangmah in thuman na phut khin a, Israel-te sungah thutang le thuman na sem khia hi.

⁵ I Topa Pasian phat unla, ama khengakna munah bia un. Amah siangtho hi.

⁶ Moses le Aaron ama siampi hi uh a, amah a biate lakah Samuel zong a kihel hi. Topaʼ tungah amaute kiko uh a, amah in amaute a dawng hi.

⁷ Amah in meii khuampi sung pan amaute tungah thu gen a, ama teci pannate le amah in amaute tungah a thukham piakte amaute in a zui uh hi.

⁸ Koteʼ Topa Pasian aw, nang in amaute na dawng hi. Amauʼ mawhna hangin gim na piak tei hangin amauʼ mawhnate a maisak nuam Pasian na hihna amauteʼ tungah na kilangsak hi.

⁹ I Topa Pasian phat unla, ama mual siangtho ah bia un; bang hang hiam cih leh i Topa Pasian a siangtho hi.