Late 98 - Tedim Bible Revision 2017

Pasianʼ Thumanna Phat Ding

¹ Amah in nalamdangte bawl ahih manin Topaʼ tungah la thak sa un. Ama khut taklam le ama khut siangthote in amah gualzosak hi.

² Topa in ama gualzawhna kitheisak khinzo a, amah in minamteʼ muhna ah ama thumanna langsak khin hi.

³ Amah thutakin, it tawntungna nei ahih manin Israel-te tungah a thuciamna a tungsak hi. Leitung mi khempeuh in eiteʼ Pasianʼ gualzawhna mu khinta uh hi.

⁴ Leitung mi khempeuh aw, Topaʼ tungah lungdamin la sa-in lungdamin awng khia unla, phatna la sa un.

⁵ Laiza lasakna tawh Topaʼ tungah phatna late sa unla, laiza lasakna le la ngaih tawh phat un.

⁶ Peengkulte le saki aw tawh Topa, Kumpipaʼ mai ah lungdamna gingsak un.

⁷ Tuipi le a sunga omte khempeuh aw, awng unla, leitung le a tunga teng khempeuhte aw, la sa un.

^8-9 Gunte aw, na khut uh beeng un. Mualte aw, Topaʼ mai ah lungdamin la sa un. Bang hang hiam cih leh leitung a uk dingin amah hong pai ta a, thumanna tawh leitung miteʼ thu ahi ding bangin hong khen ding hi.