Late 96 - Tedim Bible Revision 2017

Phatna La

¹ Leitung mi khempeuh aw, Topa tungah la thak khat sa un. Topa tungah la sa un.

² Topa tungah la sa unla, ama min phat un. Ni khat khit ni khat ama hong hotkhiatna thu gen tawntung un.

³ Ama minthanna minamte lakah gen unla, ama nalamdang septe mi khempeuh lakah pulak un.

⁴ Bang hang hiam cih leh Topa lian a, nakpi takin phat ding ahi hi; pasian dangte khempeuh sangin amah zahtak zawk ding ahi hi.

⁵ Bang hang hiam cih leh minam dangteʼ pasian khempeuh milim hi lel a, ahih hangin Topa ahihleh vantungte a bawlpa ahi hi.

⁶ Pahtawina le liatnate ama mai ah om a, hatna le hoihnate ama omna mun siangtho ah om hi.

⁷ Minamkimte aw, Topa in minthanna le hatna nei hi, ci-in mang un. Topa in nei hi, ci-in mang un.

⁸ Ama min in a ngah dingin a kilawm minthanna Topaʼ tungah pia unla, biakpiakna hong kengin ama huang sungah hong pai un.

⁹ Puan siangtho silhin Topa bia un. Leitung mi khempeuh aw, ama mai ah liing un.

¹⁰ Minam khempeuh lakah thu gen kawikawi unla, “Topa in uk hi. Leitung kikipsak a, kiliing ngei lo ding hi. Amah in mihingteʼ thu a manin khen ding hi,” ci un.

¹¹ Vantung mite kipak henla, leitung mite lungdam hen. Tuipi le a sunga om khempeuh awng ta uh hen.

^12-13 Lo le a sunga om khempeuh nuamin diang uh hen. Gamlak a sing om khempeuh in Topaʼ mai ah lungdamin la sa hi. Bang hang hiam cih leh amah hong pai ta hi. Leitung miteʼ thu a khen dingin hong pai ta hi. Amah in thumanna tawh leitung ukin miteʼ thu ahi bangin khen ding hi.