Late 94 - Tedim Bible Revision 2017

Thukkik ding Ngetna

¹ A thukkik Pasian, a thukkik Pasian, Topa aw, na hehna hong lak khia in.

² Tho in, leitung thukhen pa aw, a kiphasak mite tungah amauʼ ngah ding a kilawm gimna pia ta in.

³ Topa aw, migilote bang tanvei lungdam ding uh a, migilote bang tanvei lungnuamin omom lai ding ahi uh hiam?

⁴ Gamtat siate bang tanvei kihisak lai ding uh a, a siat gamtatna uh bang tanvei kisialh pih lai ding ahi uh hiam?

⁵ Topa aw, amaute in nangma mite su gawp uh a, nangma luahte gimsak uh hi.

⁶ Amaute in meigong numeite le khual mite that lumin pa nei lote suam lum uh hi.

⁷ Amaute in, “Topa in mu lo hi; Jakob Pasian in thei lo hi,” hong ci uh hi.

⁸ Thei tel un, mi lungsimmawl pente aw! Lung pil lote aw, cik ciangin pil ding na hi uh hiam?

⁹ I bil a bawlpa in khua za lo ding ahi hiam? I mit a piangsak pa in khua mu lo ding ahi hiam?

^10-11 Minamte a thuhilhpa in mi thuhilh lo ding ahi hiam? Mihingte tungah theihtheihna a hilh Topa in mihingteʼ ngaihsutna thei a, amaute pen husan bang bek ahihna teltakin a thei hi.

^12-13 Topa aw, migilote adingin gum khat a kitawh hun mateng, haksat hun sungteng a tawlngak theih nadingin na thukham na hilh mi, na thuhilh mi, mi nuamsa ahi hi.

¹⁴ Bang hang hiam cih leh Topa in ama mite nusia lo dinga, ama luahte paidak lo ding hi.

¹⁵ Bang hang hiam cih leh thutang pen thuman mite tungah hong tungkik dinga, lungsim thutang khempeuh in amah zui ding uh hi.

¹⁶ Kei adingin migilote a do dingin kua kipan ahi hiam? Kei adingin siatna a bawlteʼ lang khat ah kua ding ahi hiam?

¹⁷ Topa in kei hong huh lo hileh, gam khing sungah ka tung khinta ding hi.

¹⁸ Topa aw, “Ka khe taal,” ci-in ka ngaihsut ciangin na itna kip in kei hong kai to hi.

¹⁹ Ka lungsim ngaihsutna a tam mahmah ciangin kei na hong hehnem a, na hong lungdamsak hi.

²⁰ Sih nading ngeina a bawl, a gilo gam ukte, nang tawh kipawl ding ahi hiam?

²¹ Amaute in thuman mihoihte thah sawm uh a, a mawhbaang lo mite sihna thuaksak uh hi.

²² Ahih hangin Topa pen keima munkip, keima Pasian, ka belh suangpi a suak khinta hi.

²³ Amah in amauʼ mawhnate amauʼ tung mahah tungsakkikin, a gitlohna hangun amaute a maimangsak ding hi. Topa, i Pasian in amaute maimangsak ding hi.