Late 90 - Tedim Bible Revision 2017

BU LINA ( La 90—106 ) Pasian Khansau, Mi Khantom

¹ Topa aw, khang tawntungin koteʼ omna mun na hi hi.

² Mual liante a kipiansak ma, leitang le leitung na bawl ma pek, a tawntung a kipan a tawntung dongin Pasian na hi hi.

³ Mi, leivui na suaksakkik a, “Mihingte aw, ciahkik un,” na ci hi.

⁴ Bang hang hiam cih leh nangma muhna ah kum tul khat a bei ciangin zanni ahi a, zan ihmut laitakin khanlawh khat sung tawh ahi zongin a kibang bek hi.

⁵ Nangmah in mite na phiat khia hi. Amaute pen a ihmu tawh kibang uh a, zingsangin a nokik lopa tawh kibang uh hi.

⁶ Zingsangin palhin thaksuakkik a, nitak ciangin vulin a keu uh hi.

⁷ Bang hang hiam cih leh nangma sinsona in kote hong susia a, na hehluatna in kote hong lausak gawp hi.

⁸ Nangmah in ka mawhnate uh na mai ah na koih a, ka khialh simnate uh na maitang ah na koih hi.

⁹ Bang hang hiam cih leh ka hun khempeuh uh na hehna-in bei a, ka nuntak hun uh husan khat bangin a bei hi.

¹⁰ Koteʼ nuntak sung kum sawm sagih bang hi a, cidam le-ung kum sawm giat bang hi thei hi. Ahih hangin tua hunsung nangawn gimna le haksatna hi a, tua hunte bei pakin kote ka maimang uh hi.

¹¹ Nang hong kizahtak nadingin na sinsonaʼ vangliatna kua in thei a, na hehnaʼ husiatna kua in thei ahi hiam?

¹² Tua ahih ciangin pilna lungsim ka ngah theih nadingun ka nuntak hun uh a tomlam ka theih nadingun hong hilh in.

¹³ Topa aw, hong kiheikik in. Bang tan sauvei ding hiam? Na nasemte hong hehpih in.

¹⁴ Ka nuntak tawntung uh lungdamin ka kipak theih nadingun zingsangin na itna kip tawh kote hong lungkimsak in.

¹⁵ Kote nong gimsak ni zah, siatna ka thuak uh kum phazah mah, kote hong kipaaksak in.

¹⁶ Na nasemte tungah na nasepna, a tate uh tungah na minthanna, na vang hong kilangsak in.

¹⁷ Koteʼ Topa Pasian aw, kote tungah na thupha hong tungsak inla, koteʼ nasepna khempeuh hong tangtungsak in.