Late 9 - Tedim Bible Revision 2017

A Manin Pasianʼ Thukhenna Hangin Lungdamna

¹ Ka lungsim khempeuh tawh Topa tungah lungdamna kong ko dinga, na bawl a lamdangte khempeuh ka gen ding hi.

² Nangma hangin nuamin ka diang dinga, na minphatna ka sa ding hi, Sangpen pa aw.

³ Ka galte a nungkik ciangin, nangma mai ah amaute pukin kisia uh hi.

⁴ Bang hang hiam cih leh keima thutanna na hong kipsak a, tokhom tungah tu-in thu a manin na khen hi.

⁵ Minamte na taii a, migilote na susia hi. A maimang dingin amauʼ min na phiat hi.

⁶ Siat denna sungah galte bei mang hi. A khuate uh na zunglot a, amaute kiphawk kha nawn lo hi.

⁷ Topa ahihleh kumpi za ah tu ngitnget a, thukhen nadingin a tokhom a bawl hi.

⁸ Leitung miteʼ thu a mantakin khen a, a kilawm bangin miteʼ thu a khen hi.

⁹ Topa pen, netniamna a thuakte adingin munkip hi a, haksat hun ciangin mun muanhuai ahi hi.

¹⁰ Topa aw, nang a hong zongte nusia lo na hih manin, na min a theite in nang hong muang uh hi.

¹¹ Zion ah a om Topa phatna la sa un! Ama nasepnate miteʼ lakah gen un!

¹² Bang hang hiam cih leh mi thahna a hua pa in amaute phawk a, a thuak miteʼ awging amah in mangngilh lo hi.

¹³ Ka tungah hong dik in, Topa! Sihna pan hong hon khia pa aw, kei hong mudahteʼ hangin keima gim thuaknate hong en inla,

¹⁴ nangmah a hong kiphatnate phawk kikkik inla, na hong hotkhiatna hangin Jerusalem khua sungah ka nuamna ka gengen ding hi.

¹⁵ Amauʼ bawl sa gum sung mahah minamte kia suk uh a, a ngenthang siahna uh ah amauʼ khe mah a awk hi.

¹⁶ Topa in thu hong khenin migilote amauʼ nasepna mahah awksakna tawh amah hong kilang hi.

¹⁷ Pasian a mangngilh minam khempeuh sung panin migilote, Leinuai ah pai ding uh hi.

¹⁸ Bang hang hiam cih leh mi cimawhte kimangngilh den lo dinga, mizawngteʼ lametna bei paisuak lo ding hi.

¹⁹ Tho in, Topa! Mi kizosak keʼn; na mai ah minamte sam inla, amauteʼ tungah thu khen in!

²⁰ Amaute lausak in, Topa! Mi ahih lelna uh minamte theisak in!