Late 88 - Tedim Bible Revision 2017

Cina paʼ Lungkham Thungetna

¹ Topa, ka Pasian aw, sunin huhna kong ngen a, zan hun sungin nangma mai ah kong kiko hi.

² Ka thungetna hong za inla, nong huh ding ka hong ngetna hong ngai in.

³ Bang hang hiam cih leh lungkhamna tampi thuakin, ka si dektak hi.

⁴ Kei pen a sidek mi tawh ka kibang ta a, ka thahatna khempeuh bei mang khinta hi.

⁵ Misite lakah a kinusia, a kithat lum, han sunga lum, na huh zawh ahi nawn lo, na phawk nawn lohte ka bang ta hi.

⁶ Kei pen, mialin a thukna mun, Leihawm thuk sungah nong koih khinta hi.

⁷ Nangma hehna keima tungah gik mahmah a, na tuihualte khempeuh tawh kei na hong vukcip hi.

⁸ Ka kikholh pih mite in kei a hong pelh dingin na hong bawl a, amaute tungah a cikzethuai khatin kei na hong bawl hi. Ka suahtak theih loh nadingin kei hong kikhumcip a,

⁹ ka gim thuakna hangin ka mit a mial ta hi. Topa aw, nisimin nangma tungah kong ngen a, thu ngenin ka khutte nangma lamah kong zan hi.

¹⁰ A si sate adingin nalamdang a bawl na hi hiam? Nangmah a phat dingin mi a si khin sate hong tho ding ahi hiam?

¹¹ Han sungah na itna kip kigen dinga, siatna munah nangma thumannate kigen ding ahi hiam?

¹² Khua mialna sungah na nalamdangte kithei a, mangngilhna gam sungah na hotkhiat huhna kithei ahi hiam?

¹³ Ahih hangin Topa aw, na tungah huhna kong ngen a, zingsang simin na mai ah thu kong ngen hi.

¹⁴ Topa aw, bang hangin kei hong paai khia na hi hiam? Bang hangin kei kiang panin na maitang seel na hi hiam?

¹⁵ Ka neu tung a kipan gim thuakin ka si dektak hi. Nong gimpiakte ka thuak a, ka cih nading mel ka thei nawn kei hi.

¹⁶ Nangma hehna in keimah hong nawk gawp khin a, a lauhuai mahmah nangma hong suk gawpna in kei hong susia ta hi.

¹⁷ Amaute in tuikhang bangin sun tawntungin kei hong umcih uh a, kei hong tuamcip uh hi.

¹⁸ Kei hong itte le ka lawmte keimah nong pelhsak khin a, khuamial bekbek, keima kikholh pih ahi hi.