Late 87 - Tedim Bible Revision 2017Pasianʼ Khuapi Minthang 1 Mual Siangtho tungah ama phuh sa khuapi om hi. 2 Topa in Israel gam mun dang khempeuhte sangin Zion kulh kongpi it zaw hi. 3 Pasianʼ khuapi aw, na minthanna teng hong kigengen hi. 4 Kei hong theite lakah Egypt le Babylon ka hel hi. Filistia, Taia le Ethiopia te zong kihel a, “Hihte pen hua lai mah panin a piang ahi hi,” kici ding hi. 5 Zion tawh kisai-in ahihleh, “Minam khempeuh ama sung pan a suak ahi hi,” kici ding hi. Bang hang hiam cih leh Sangpen pa mahmah in amah kipsak ding hi. 6 Topa in, “Hihte pen hua lai-a suak,” ci-in minam khempeuh ciamtehin a gelh ding hi. 7 Tua sunga teeng mite in, “Koteʼ lungdamna khempeuh nangma sungah om hi,” ci ciat ding uh hi. |
Tedim Bible © Bible Society of Myanmar, 2017.
Bible Society of Myanmar