Late 86 - Tedim Bible Revision 2017

Pasianʼ Hehpih ding Ngetna

¹ Topa aw, kei hehpihhuai-in cimawh ka hih manin na bil hong ngat inla, hong dawng in.

² Mihoih ka hih manin kei hong kem in. Nangmah a hong muang na nasem pa hong hon in.

³ Nang pen ka Pasian na hi hi. Topa aw, sun tawntung hong kiko ka hih manin kei hong hehpih in.

⁴ Topa aw, nangma tungah thu hong ngen ka hih manin na nasem pa hong kipaaksak in.

⁵ Bang hang hiam cih leh Topa aw, nangmah hoihin mawhna na maisak a, hong ngente khempeuh tungah itna kip tampi na nei hi.

⁶ Topa aw, ka thungetna hong za inla, nang tungah thumin kong kikona hong ngai in.

⁷ Kei hong dawng na hih manin ka haksat hun ciangin nangma tungah kong ngen hi.

⁸ Topa aw, pasian-te lakah nang tawh a kibang kuamah om lo a, nangma sep bang, kuamah in sem thei lo hi.

⁹ Topa aw, na bawl sa minam khempeuh hong pai-in na mai ah hong kun ding uh a, nangma min hong phat ding uh hi.

¹⁰ Bang hang hiam cih leh nangmah lianin nalamdangte na bawl a, nang bek Pasian na hi hi.

¹¹ Topa aw, nang tungah hong thumanin nangma lampi ka zuih theih nadingin kei hong hilh inla, nangma min a zahtakte tawh keima lungsim pum khat hong bangsak in.

¹² Topa ka Pasian aw, ka lungsim khempeuh tawh na tungah ka lungdam a, nangma min ka thangsak ngitnget ding hi.

¹³ Bang hang hiam cih leh keimah na hong itna kip lian mahmah a, Leinuai thuk sung panin kei nong hon khia khin hi.

¹⁴ Pasian aw, mi kihisakte, kei langpangin hong kipan hi. Thu-helhawt mi pawl khat in kei, thah hong sawm uh a, amaute in nang hong thudon lo uh hi.

¹⁵ Ahih hangin Topa aw, nang pen a hehpih thei, a dik Pasian na hi a, heh hak mahmah in, itna kip le thumanna tawh a kidim na hi hi.

¹⁶ Kei lamah hong kihei inla, kei hong hehpih in. Na nasem pa thahatsak inla, na nasem numeiʼ tapa hong hon in.

¹⁷ Topa nangmah in kei hong huhin, nong thahatsakna hangin, kei hong mudahte in mu-in a zahhuai nadingun keima tungah na maipha hong lak in.