Late 85 - Tedim Bible Revision 2017

Pasian in Israel-te A Hehpih ding Ngetna

¹ Topa aw, nangma leitang na hehpih a, Jakobʼ nopsaknate a ngeina na bangsakkik hi.

² Na miteʼ mawhna na maisak a, amauʼ khialhna khempeuh na maisak hi.

³ Na hehna khempeuh na damsak a, na sinsona na daisak hi.

⁴ Kote hong hon khia Pasian aw, kote ka ngei uh hong bangsakkik inla, kote tunga na lungkim lohna hong beisak ta in.

⁵ Koteʼ tungah heh paisuak ding na hi hiam? Khang tawntungin heh paisuak ding na hi hiam?

⁶ Kote in nangmah kong phat theih nadingun ko na mite hong nungtasakkik lo ding na hi hiam?

⁷ Topa aw, kote tungah na itna kip hong lak inla, hong huhin hong hon in.

⁸ Topa Pasianʼ thugen ding hong zasak dih un. Bang hang hiam cih leh ama lamah lungsim takpi tawh a kihei ama mi siangtho, ama miteʼ tungah kilemna thu a gen ding hi.

⁹ I gam sungah minthanna a om theih nadingin amah a zahtakte adingin ama hong hotkhiatna hong om takpi hi.

¹⁰ Itna kip le thutak kigawm dinga, thuman le kilemna kihual ding uh hi.

¹¹ Leilak panin thutak hong po khia dinga, vantung panin thuman in hong en suk ding hi.

¹² Topa in a hoih nate eite tungah hong pia dinga, i leitang in hauhna piangsak ding hi.

¹³ Topaʼ mai ah thuman na ma pai dinga, ama lampi a bawl khol ding hi.