Late 84 - Tedim Bible Revision 2017

Pasianʼ Inn Lunggulhna

¹ Vanglian Topa aw, nangma teenna mun bangzah takin etlawm ahi hiam?

² Keʼn ka lunggulh mahmah hi. Topaʼ huang sung ka lunggulh mahmah a, ka lungsim le ka pumpi a nungta Pasianʼ tungah lungdam mahmah in la a sa hi.

³ Vanglian Topa, ka kumpi le ka Pasian aw, na biakna tau ah, kawlgit nangawn in a inn ding mu a, phialphiah in a om nading, a note a koih nading bu a mu hi.

⁴ Nangma inn sungah teengin, nangmah phatna a sa ngitnget mite thupha ngah mi ahi uh hi.

⁵ Nangma tung panin thahatna ngahin Zion zuatna lampi a tawn nuam mite thupha ngah mi ahi uh hi.

⁶ Amaute in Kuam keu mun kantanin a pai laitakun tua kuam pen ciktui tampi tawh kidim a, guahzu masate in zong tua mun pen bualtuite tawh a kidimsak hi.

⁷ Amaute a paikawmun a tha uh hat semsem a, pasian-teʼ Pasian Zion ah mu ding uh hi.

⁸ Vanglian Topa Pasian aw, ka thungetna hong za inla, ka thungetna hong ngai in, Jakob Pasian!

⁹ Pasian aw, kote a hong hu ding pa hong etsak inla, na sathau nilh pa hong kem in.

¹⁰ Bang hang hiam cih leh mun dangah ni tul khat om sangin nangma huang sungah ni khat om hoih zaw hi. Gitlohna inn sungah ka ten sangin ka Pasianʼ inn kongcing pa ka hi nuam zaw hi.

¹¹ Bang hang hiam cih leh Topa Pasian pen eite a hong hupa a minthang i kumpi hi a, maipha le pahtawina a hong pia pa ahi hi. Thumanin a gamta mite tungah Topa in na hoih bangmah siit lo hi.

¹² Vanglian Topa aw, nangmah a hong muang mite, thupha ngah mi ahi uh hi.