Late 83 - Tedim Bible Revision 2017

Pasian in Israel-teʼ Galte A Suksiat ding Ngetna

¹ Pasian aw, dai dide-in om kei in. Lungnuamin, tang loin om mawk kei in, Pasian aw.

² Bang hang hiam cih leh na galte in gamlumna piangsak uh a, nang hong mudahte kiphasak mahmah uh hi.

³ Amaute in khem siamna tawh na mite thangsiah uh a, amaute in na it mite langpangin thu kikum uh hi.

⁴ Amaute in, “Hong pai un, minam khat hihna panin amaute beisak ni. Israel min peuhmah kiphawksak nawn kei ni!” ci uh hi.

⁵ Amaute in siat nading geelin kithukhat uh a, nangmah hong langpangin thuciamna a bawl uh hi.

⁶ Edom mite le Ishmael mite, Moab le Hagri mite,

⁷ Gebal, Ammon le Amalek mite, Filistia le Taia khua mite tawh thuciam a bawl uh hi.

⁸ Assiria mite in zong amaute pawlpih uh a, amaute pen Lotʼ suanlekhakte adingin pawl muanhuaite ahi uh hi.

^9-10 Endor munah a kizo gawp, leilak ah a luang uh a muat gawp, Midian miteʼ tungah na bawl bang leh, Kishon gun-a Sisera le Jabin-teʼ tungah na bawl bangin amaute tungah bawl in.

^11-12 “Pasianʼ gam hoihte eima tan dingin la ni,” a ci Oreb le Zeeb te bangin amauʼ mi liante bawl inla, Zeba le Zalmunna te bangin amau a ukte khempeuh bawl in.

¹³ Ka Pasian aw, amaute pen pingpei sunga ninnen, huih mai-a ansi leeng bangsak ta in.

¹⁴ Mei in gamlak a hal tum bang, mual liante a kuansak bangin

¹⁵ na khuapi huihpi tawh amaute delh inla, na huihpi tawh amaute lausak gawp in.

¹⁶ Topa aw, amaute in na min hong zon theih nadingin amaute khempeuh maizumna tawh kidimsak in.

¹⁷ Amaute maizumin lungkia densak inla, a mindai-in siasak in.

¹⁸ Topa a kici min nei nangmah bek leitung khempeuh ah a Sangpen pa na hihna amaute theisak in.