Late 82 - Tedim Bible Revision 2017

Thutang loin Thukhente Kitai

¹ Thu vaihawm kikhopna sungah Pasian in ama panmun hong len a, amah in pasian-teʼ lakah thu a khen hi.

² “Note in bang tanvei a man loin thu khenin, migilote tungah angvanna zang ding na hi uh hiam?

³ A gina lo mite le pa a nei lo mite tungah thuman unla, a thuakte le a cimawhteʼ thu a manin khen un.

⁴ A gina lo mite le a cimawh mite hon unla, migiloteʼ khut sung panin amaute hon khia un,” a ci hi.

⁵ Amaute in thutheihna ahi a, thutelna ahi zongin bangmah nei lo uh a, khuamial sungah gamta uh ahih manin leitung bulpite khempeuh a kiliing gawp hi.

⁶ Keʼn kong cih in ah, “Note khempeuh, Sangpen paʼ tate, pasian-te na hi uh hi.

⁷ Ahi zongin mite bangin si-in, kumpi khat peuhpeuh bangin na kia ding uh hi,” kong ci hi.

⁸ Pasian aw, tho in; leitung mite thu khen in. Bang hang hiam cih leh minam khempeuh nangma aʼ ahi hi.