Late 81 - Tedim Bible Revision 2017

Pasianʼ Hoihna le Ama Mite A Lunggulhna

¹ Eiteʼ thahatna Pasianʼ tungah nakpi takin la sa unla, Jakob Pasianʼ tungah lungdamin awng un.

² La khat phuangin, khuang no tumin, a ngaih laiza khausai lasakna le harp khausai lasakna limtakin tum un.

³ Khadet, khalik, i pawi ni-in peengkul tum un.

⁴ Bang hang hiam cih leh, tua bang hih ding pen Israel-te adingin thukham hi a, Jakob Pasianʼ biakna ngeina a kip khat ahi hi.

⁵ Egypt gamah a pai lai-un Israel miteʼ tungah thupiakna-in amah in a neih ahi hi. Ka theih ngei loh kampau khat hih bangin ka za hi:

⁶ “Na liangko uh a om na vangikte uh ka hong lakkhiatsak a, na khut uh a vangikte ka hong khiasak hi.

⁷ Na cihmawh uh ciangin kei na hong sam uh a, keimah in note ka hong hon khia hi. A kilang lo vanging sung panin note kong dawng a, Meribah tui phualte ah note ka hong ze-et hi.

⁸ Ka mite aw, note kong thuhilh laitakin limtakin hong ngai un. Israel-te aw, keima thu a hong ngai hi hoh le-uhcin!

⁹ Noteʼ lakah pasian dang om lo dinga, pasian dang khatʼ mai ah na kun kei ding uh hi.

¹⁰ Egypt gam panin note a hong la khia, Topa na Pasian uh ka hi hi. Na kam uh a golin ka un, keimah in kong dimsak ding hi.

¹¹ “Ahih hangin ka mite in keima thu hong ngai lo uh a, Israel-te in keima thu themkha zong zui lo uh hi.

¹² Tua ahih ciangin a ut bangun a gamta dingin amauʼ lungsim khauhna bangin ka gamtasak hi.

¹³ Ka mite in ka thu hong ngai-in, keima deih bangin Israel a gamta hileh!

¹⁴ Amauʼ galte khempeuh ka zawhsak pak dinga, amauʼ galte langpangin ka khut ka liik ding hi.

¹⁵ Kei a hong mudahte ka mai ah hong kun ding uh a, amauteʼ gim thuakna kip paisuak ding hi.

¹⁶ Mangbuh hoih pen tawh note ka hong vak dinga, suangpi pan a khuaizu tawh note kong gilvahsak ding hi,” a ci hi.