Late 80 - Tedim Bible Revision 2017

Israel-te A Ngei A Batsakkik ding Ngetna

¹ Tuu hon bangin Josef a paipih, Israel Tuucingpa aw, ngai in! Kherub tungah a tupa aw,

² Efraim, Benjamin le Manassehʼ mai ah taang khia in! Na tha saan inla, kote a hon khia dingin hong pai ta in.

³ Ka ngei uh hong bangsakkik in, Pasian aw. Kote khempeuh hong kihotkhiat theih nadingin na maitang hong taangsak in.

⁴ Vanglian Topa Pasian aw, na miteʼ thungetna ah bang tanvei sin so niloh ding na hi hiam?

⁵ Nangmah in a an dingun amaute tungah khitui na pia a, amauteʼ dawn dingin khitui tampi na pia hi.

⁶ Nangmah in, ka veengte uhʼ thusim lohin kote na hong bawl a, ka galte un hong thusim loin hong nuihsan uh hi.

⁷ Ka ngei uh hong bangsakkik in, Vanglian Pasian aw. Kote khempeuh hong kihotkhiat theih nadingin na maitang hong taangsak in.

⁸ Nangmah in Egypt panin leenggui khat na la a, minam dangte hawl khia-in, tua leenggui na suan hi.

⁹ Nangmah in tua leenggui adingin leitang na hahsiang a, amah in zung thuk kha-in gam sung a dim hi.

¹⁰ Ama liim in mual liante hoihtakin liimsun a, a hiang in taamtak sing liante hoihtakin khuh a,

¹¹ tuipi lamah a hiangte zamin, a dawnngekte in Gunpi lam a zuan hi.

¹² Tua ahih ciangin, lampi ah a pai mi khempeuh in a gah a lawh theih nadingin, bang hangin nangmah in a daigawl suvang na hi hiam?

¹³ Gamlak a om ngal in susia gawp a, zang sung sa khempeuh in kivakna-in nei uh hi.

^14-15 Hong kiheikik in, Vanglian Pasian aw. Vantung panin hong en sukin hong mu in. Na khut taklam in a suan sa, hih leenggui hong don in.

¹⁶ Amaute in mei tawh halin sattan gawp uh hi. Amaute heh et inla, susia gawp in.

¹⁷ Ahih hangin nangma adingin na hatsak miʼ tapa, na taklam a om mipa tungah na thahatna guan in.

¹⁸ Tua ciangin nang kiang panin ka kiheikik nawn kei ding uh hi. Kote hong nungtasak in, nang kong phat ding uh hi.

¹⁹ Ka ngei uh hong bangsakkik in, Vanglian Topa Pasian aw. Kote khempeuh hong kihotkhiat theih nadingin na maitang hong taangsak in.