Late 79 - Tedim Bible Revision 2017

Biakinn Kininsak: Pasianʼ Huh ding Ngetna

¹ Pasian aw, na luah gam sungah dawi biate hong pai uh hi. Amaute in na biakinn siangtho ninsak gawp uh a, Jerusalem khuapi siasak gawp khin uh hi.

² Amaute in, na nasemteʼ luanghawmte huihlak vasate pia uh a, na mi siangthoteʼ sate leilak ganhingte a pia uh hi.

³ Amaute in Jerusalem kimkot ah tui buakkhiat bangin amauteʼ sisan bua khia uh a, amaute a vui ding kuamah om lo hi.

⁴ Kote pen ka veengte uhʼ zahko, ka kiim uh a omte in a hong ko a hong nuihsat ka suak khinta uh hi.

⁵ Topa aw, bang tanvei hi ding ahi hiam? Heh paisuak ding na hi hiam? Nangma hazat hehna meikuang bangin kuang paisuak ding ahi hiam?

⁶ Nangmah a hong thei lo minamte tung le, nangma tungah thu a hong ngen lo kumpi gamte tungah heh gawp in.

⁷ Bang hang hiam cih leh amaute in ka mite uh that mang khin uh a, ka gam sung khempeuh uh susia gawp khin uh hi.

⁸ Ka pu ka pate uh mawhna hangin ko a suanlekhakte hong lang ngaihsut kei inla, hong kiniamkoih ahih manin kote a huh dingin na hehpihna hong paisak mengmeng in.

⁹ Kote a hong hon khia Pasian aw, nangma min a than nadingin kote hong huhin, nangma min hangin kote hong khah khia-in, ka mawhnate uh hong maisak ta in.

¹⁰ “Amauteʼ Pasian koi ah om ahi hiam?” minam dangte in a cih ding kilawm ding ahi hiam? Na nasemteʼ sisan luang khia a phulakna pen, minam dangteʼ lak, komauʼ muhna ah kitheisak in.

¹¹ Thongkiateʼ tauna ngai inla, thah dingin a kisehte na vangliatna tawh kizui-in suaktasak in.

¹² Amaute in nang hong zahkona mah tawh ka veengte uhʼ ang sungah a zah sagihin thuk in, Topa!

¹³ Tua ciangin nangma mi, nangma gam sung tuu kote in nangma tungah lungdamna kong lak ngitnget ding uh a, a khangkhangin nangmah phatnate ka gengen ding uh hi.