Late 78 - Tedim Bible Revision 2017

Mite Thumang lo Napi-in Pasian in Lamlak

¹ Ka mite aw, keima hilhna ngai unla, ka kam tawh ka thugente na bil uh hong ngat un.

^2-3 Note tungah thu gentehna zangin ka kam ka-in thu kong gen ding hi. I pu i pate in hong gen sa, eite in i zak sa le i theih sa, tanglai-a thuthukte ka hong gen khia ding hi.

⁴ Hih thute, i tate tungah eite in im loin, a hong piang lai ding khang thakte tungah, Topaʼ minthang nasepna, ama vangliatna, ama sep sa nalamdangte i gen ding hi.

^5-8 Amaute pen Pasian tungah a lungsim thuman lo, lungsim kip a nei lo khangmi, lungsim khauhin a lehdo khangmi, amauʼ pu le pate tawh kibang loin, amaute in Pasian sungah amauʼ lametna koihin, Pasianʼ nasepnate mangngilh loin, ama thupiakte zui-in, a suak nai lo naupangte, a hong piangkik khang thakte in a thu thei-in, amaute ding khia-in amauʼ tuletate tungah a thu a gen theih nadingin, amah in, i pate in a tate a hilh sawn dinga a sawl ahi, Israel sungah thukham khat koihin, Jakob sungah teci panna khat a koih hi.

⁹ Thal a tawi Efraim mite, gal kido ni-in nungkik uh hi.

¹⁰ Amaute in Pasianʼ thuciamna zui lo uh a, ama thukham bangin gamta nuam lo uh hi.

¹¹ Ama bawl sa le amaute tungah nalamdang a lah sate amaute in mangngilh uh hi.

¹² Egypt gam sung Zoan munah, a pu a pate uhʼ muhna ah amah in nalamdang a bawl hi.

¹³ Amah in tuipi kikhensakin amaute kantansak a, tuite a lompi-in a omsak hi.

¹⁴ Sun hunin amah in amaute meiipi khat tawh kha a, zan tawntung, meikuang taang khat tawh amaute a kha hi.

¹⁵ Amah in gam sungah suangpite kitamsak a, tui thukpi sung panin a piang khia bangin amauteʼ tungah tui dawn ding tampi a pia hi.

¹⁶ Amah in suangpi sung panin luitui luang khiasak a, gun tui luang bangin tuite a luangsak hi.

¹⁷ Ahi zongin ama tungah amaute khial lailai uh a, Sehnel gam sungah Sangpen pa a lehpan uh hi.

¹⁸ Amaute in amauʼ duh mahmah an a kalhna uh tawh amaute in a lungsim sung uh ah Pasian a ze-et uh hi.

¹⁹ Amaute in Pasian gensia uh a, “Pasian in gamlak ah an pia thei ding ahi hiam?

²⁰ Amah in suangpi sat a, tui leng khia-in tuite dim let takpi ahi hiam? Amah in ama mite, an ahi a, sameh ahi zongin a pia thei takpi ahi hiam?” a ci uh hi.

²¹ Topa in tua thu a zak ciangin hehna tawh kidimin, meikuang tawh Jakob su gawp a, Israel tungah a heh semsem hi.

²² Bang hang hiam cih leh amaute in Pasian um lo uh a, a hon khia zo dingin muang lo uh hi.

²³ Ahi zongin amah in, tunga om vantungte thu pia-in, vantung kongte hong a,

²⁴ nek dingin amau tungah manna an zusakin, amaute tungah vantung an a pia hi.

²⁵ Mihingte in vantung miteʼ an ne uh a, amah in amaute tungah an tampi a puak hi.

²⁶ Amah in vantungah nisuahna huih nungsakin, ama vangliatna tawh leitaw lam huih paikhiatpih a,

²⁷ amah in amaute tungah leivui zah-a tam sa zusak a, tuipi sehnel zah-a tam vasate a khiat suk hi.

²⁸ Amauʼ giahphual laizang, amauʼ omna kiim khempeuh ah tuate a kiasak hi.

²⁹ Amauʼ duh pen pia ahih manin, amaute in ne-in gilvah uh hi.

³⁰ Ahih hangin amaute in a duh pen uh a kham ma, amauʼ kam sungah an a om laipi mahin,

³¹ amauteʼ tungah Pasianʼ hehna tungkikin amah in amaute lakah a hat pen teng thatin, Israel-teʼ muan le suan teng a vatlum hi.

³² Hih nalamdangte khempeuh a om khin hi napi-in amaute khial lai veve uh a, ama nalamdangteʼ hangin amaute in um tuan lo uh hi.

³³ Tua ahih ciangin amah in amauʼ hunte husan khat bangin maimangsak a, amauʼ nuntakna, launa lianpi tawh a beisak hi.

³⁴ Amaute pawl khat a thah khit ciangin a om lai mite in amah zong pan uh hi. Amaute kisikin, lungsim taktak tawh Pasian a zong uh hi.

³⁵ Amaute in Pasian pen, amaute a hon khia, Sangpen Pasian, amaute a hupa ahihna a phawk uh hi.

³⁶ Ahih hangin amaute in a kampi bek uh tawh amah phat khem uh a, a leii uh tawh ama tungah zuaugen uh hi.

³⁷ Amauteʼ lungsim ama lamah kip lo uh a, ama thuciamna ah amaute thuman lo uh hi.

³⁸ Ahi zongin amah in hehpihna lungsim nei ahih manin amauʼ khialhnate maisakin, amaute susia lo hi. Amah in a hehna ip zelzel a, a hehna khempeuh phong khia lo hi.

³⁹ Amah in, amaute pen mihing hi lel a, a hong paikik nawn lo huihnung bang ahihna uh a phawk hi.

⁴⁰ Amaute in gamlak ah amah lehdo zelzel uh a, sehnel gam sungah amah dahsak uh hi.

⁴¹ Amaute in amah ze-et kikkik uh a, Israel-teʼ Siangtho Pasian a phin uh hi.

^42-43 Galteʼ kiang panin amah in amaute a hotkhiat ni hitaleh, Egypt gamah ama limte a bawl hun lai hitaleh, Zoan gamah a bawl a nalamdangte hitaleh, ama vangliatna hitaleh, amaute in ngaihsutin nei lo uh hi.

⁴⁴ Amaute in a lui tuite uh a dawn theih loh nadingin amauʼ gun tuite amah in sisan a suaksak hi.

⁴⁵ Amaute a pet thei cippi honte, amauteʼ lote a susia uiphukte amauʼ lakah a sawl hi.

⁴⁶ Amauʼ lo ante tangngol pia a, amauʼ sepna gahte kauphe a pia hi.

⁴⁷ A leengguite uh gial tawh deng gawp a, a theithekte uh vukkhal tawh susia hi.

⁴⁸ A ganhingte uh gial tawh deng lum a, a gan khawite uh keek tawh a deng lum hi.

⁴⁹ Amauteʼ tungah a lauhuai ama sinsona, hehna, thangpaihna, gimna, le a susia thei van mi hon khat a khah hi.

⁵⁰ Amah in a sinsona ip loin, kuamah hinkhawi lo a, pulnatna tawh amaute a sisak hi.

⁵¹ Hamʼ suanteʼ inn sungah a ta upa pen teng, Egypt gam sung tacil khempeuh amah in a vatmai hi.

⁵² Tua ciangin amah in tua bangin ama mite gamlak ah paikhiat pihin, ganhing honpi bangin amaute a paipih hi.

⁵³ Amah in a muanhuaina munah amaute paipih ahih manin amaute lau lo uh hi. Ahih hangin tuipi in amauʼ galte tuumcip hi.

⁵⁴ A khut taklam tawh ama ngah sa mual ahi, a gam siangtho ah amaute a paipih hi.

⁵⁵ Amauʼ mai panin midangte hawl khia-in, amauteʼ luah ding neihsa hawmsak a, Israel minamte amauʼ buk sungah a tengsak hi.

⁵⁶ Ahi zongin amaute in Sangpen Pasian ze-etin lehdo uh a, ama thupiakna zui loin,

⁵⁷ a pu a pate uh mah bangin kihei khia-in a zuau gamtat uh hi. Thal gina lo bangin amaute a kihuiheek uh hi.

⁵⁸ Bang hang hiam cih leh amaute in a mun sangte uh tawh amah a sin so nadingin phinphin uh a, amauʼ milim bawlte tawh ama hazat nading a piangsak uh hi.

⁵⁹ Pasian in a zak ciangin heh pha mahmah a, amah in Israel-te a nial siangtho hi.

⁶⁰ Mihingteʼ lakah ama omna puanbuk ahi, Shiloh khua-a ama omna biakinn nusia a,

⁶¹ ama vangliatna, galteʼ tungah ap a, ama minthanna, galteʼ khut ah a pia hi.

⁶² Amah in ama mite namsau tawh sisak a, ama luahte tungah a hehna a nga hi.

⁶³ Mei in a tangvalte kaang lum a, a nungakteʼ pasal ding kuamah om nawn lo hi.

⁶⁴ Amauʼ siampite, namsau in puksak a, amauʼ zite in a pasalte kah zo lo uh hi.

⁶⁵ Tua ciangin Topa pen zukhamin a awng mi thahatpa, a ihmu tho bangin a khanglo hi.

⁶⁶ Amah in a langpangte zo a, a maizum tawntung dingin amaute a koih hi.

⁶⁷ Amah in Josefʼ suante nial a, Efraim minamte teel lo hi.

⁶⁸ Ahih hangin ama it Zion Mual, Judah minam a teel hi.

⁶⁹ A kip den dingin a phuh sa leitang bang leh, a vantung inn bangin ama biakinn a lam hi.

^70-71 Amah in ama mi Jakob, ama luah Israel a cing dingin, no a nei tuupite a cinna, tuubukte panin la-in, ama nasem David a teel hi.

⁷² Amah in lungsim thutang tawh amaute hoihtakin cingin, a siam mahmah a khut tawh amaute lam a lak hi.