Late 76 - Tedim Bible Revision 2017

Zion ah Pasianʼ Liatna

¹ Judah gam sungah Pasian kithei a, Israel gam sungah ama min lian hi.

² Zion khua sungah ama teenna mun kibawl hi.

³ Amah in tua lai ah thaltangte, lum, namsau le galhiamte a kuaitan hi.

⁴ A om ngitnget mual liante sangin na min thang zaw a, na lian zaw hi.

⁵ A thahatteʼ neihsa nate kisut khia a, amaute ihmucip suak uh hi.

⁶ Jakobʼ Pasian aw, nangma thuhilhna hangin sakol le a tung tuang pa khawlcip uh hi.

⁷ Ahih hangin nang na kihtakhuai mahmah hi. Na heh khit phot ciangin nangma mai ah kua ding ngam nawn ding ahi hiam?

^8-9 Vantung panin thukhenna na gen khia hi. Gimna a thuak leitung mi khempeuh a hon dingin thukhen dingin Pasian a kipat ciangin leitung lau mahmah in tang het loin a om khikhe hi.

¹⁰ Mihingteʼ hehna in nang hong kiphatna ding piangsak dinga, na hehna panin a suakta mite in nangmah pahtawina pawi a bawl ding uh hi.

^11-12 Topa na Pasianʼ tungah na thuciamnate uh pia unla, tuate khempeuh zui un. Leitung kumpite sangin a kihtakhuai zaw, ulianteʼ lungsim a niamkhiat, zahtak ding ahi paʼ tungah, ama kiimah a om mi khempeuhte in letsong puak ta uh hen!