Late 7 - Tedim Bible Revision 2017

Migilote tungah Thutang a Sep ding Ngetna

¹ Topa ka Pasian aw, nangmah kong bel hi. Kei hong delhteʼ kiang panin hong dal inla hong hon in.

² Kei hong hon kei lecin a hong hon ding dang kuamah om lo ahih manin amaute in humpinelkai bangin hong kai khia-in hong bal gawp ding uh hi.

³ Topa ka Pasian aw, ka gamtat a siat a, ka khut a khialh leh,

⁴ bangmah thu om lopi-in ka lawmte khemin, ka galte ka huh taak leh,

⁵ galte in kei hong delhin hong pha uh henla, leilak ah kei hong tuancilsak inla, leilak ah kei hong sial pai ta uh hen.

⁶ Tho in, Topa, a hehsa-in thasaan inla, ka galteʼ hehna panin kei hong dal in. Khanglo in, ka Pasian aw, thukhen nading hun khat na seh khinzo hi.

⁷ Nangma omna kiimah mite kikhawmsak inla, amauteʼ omna tung a sangna munah tu in.

⁸ Topa in mite thu a khen hi. Topa aw, ka thumanna le keima sunga om ka dikna tawh kizui-in thu hong khen in.

⁹ Lungsim le ngaihsutna a en a thuman Pasian aw, migiloteʼ siatna beisak inla, mi thumante kipsak in.

¹⁰ Pasian, kei hong hupa hi a, lungsim man mite a hon hi.

¹¹ Pasian, thu a tangin a khen pa hi a, migilote tungah a heh den pa ahi hi.

¹² Mite a kibawl phatkik kei leh, Pasian in a thalkhau hek zo a, a namsau taat ding hi.

¹³ Amah in mei thaltang bawl a, sih theihna ama galhiamte a baih sa-in a koih zo hi.

¹⁴ Migilo in thusia paii a, suak nuamin na a, zuau thu a hing khia hi.

¹⁵ Amah in gum to a, ama tawh sa gum sung mahah amah a kia hi.

¹⁶ Ama lunggulh hoih lo pen ama lu tungah tukik a, ama gamtat sia pen ama luzang mahah tukik hi.

¹⁷ Keʼn ahihleh, ama dikna om bangin Topaʼ tungah lungdamna ka lak dinga, a Sangpen Topaʼ minphatna la ka sak ding hi.