Late 68 - Tedim Bible Revision 2017

Pasianʼ Gualzawh La

¹ Pasian hong kipan henla, ama galte kithehthangsak hen. Amah a mudahte ama mai ah tai uh hen.

² Meikhu leeng khia bangin amaute a hawl khia ding hi. Mei mai ah khuainun a tui bangin Pasianʼ mai ah migilote sia mang ding hi.

³ Ahih hangin midikte lungdam ding hi. Pasianʼ mai ah nuamin diang ding uh a, amaute lungdam mahmah in awng-awng ding uh hi.

⁴ Pasianʼ tungah la sa unla, ama minphatna la sa un. Meiite tungah a tuang pa la sak un. Ama min pen Topa ahi hi; ama mai ah lungdamin diang un!

⁵ Pa nei loteʼ pa le meigong numeite a hupa pen, a siangtho mahmah ama omna ah a om Pasian ahi hi.

⁶ Pasian in a cimawhte a ten nading inn le lo guan a, thong kia mite nopsakna munah a tunpih hi. Ahih hangin mi lehdote ahihleh keugaw gamah teeng uh hi.

⁷ Pasian aw, nangma mite mai ah na kuan khiat ciang, gamlak nawkin na pai ciangin,

⁸ nangmah Pasian na om manin lei kiliing gawpin vantungte in guah a zusak hi. Pasian ahi, Israel Pasianʼ omna ah Sinai mual nangawn a kiliing gawp hi.

⁹ Pasian aw, na luah mite vul gawp uh ahih manin guah tampi zusakin na nosuaksakkik hi.

¹⁰ Nangma mihonte in tua sungah omna ding mu uh hi. Pasian aw, nangma hoihna tawh a cimawh miteʼ kisapna a kicingin na guan hi.

¹¹ Topa in thu pia hi: Hih thu a pua mihonte tam mahmah uh a,

¹² “Kumpipaʼ galkapte tai uh!” ci uh hi. Inn-a om nupite in galteʼ van a kisutte hawm uh a, tua vante pen

¹³ ngun tawh a kizut vakhu limte hi a, a khate kham tawh kizut hi. Bang hangin note pawl khat, tuukhawk sungah mawk om na hi uh hiam?

¹⁴ Vanglian pa in tua gam panin kumpite a nawh keek ciangin Zalmon mual tungah vuk a kia tawh kibang hi.

¹⁵ Aw mual lianpi, Bashan mual, aw mual dawnzum tampi a nei Bashan mual!

¹⁶ Dawnzum tampi a nei mual aw, Pasian in ama om nadingin a deih mual Pasianʼ om tawntung nading mun bang hangin simmawh et na hi hiam?

¹⁷ Leeng muanhuai tul sawm nih, vantungmi a tultul tawh, Sinai mual pan siangtho munah Topa hong pai hi.

¹⁸ Topa nangmah Pasian tua munah na om theih nadingin a sangna ah kah to-in salte na paipih a, mihonte le mi lehdoteʼ tung nangawn panin piakkhong nate na ngah hi.

¹⁹ Nisimin eite adingin a hong thuaksak Topa in thupha ngah tahen. Pasian pen eite hong hon khia pa ahi hi.

²⁰ Eiteʼ Pasian pen hong hon khia Pasian hi a, sihna pan a hong suaktasak Topa Pasian ahi hi.

²¹ Ahih hangin Pasian in mawhna a gamta a galteʼ lutang khempeuh sukham ding hi.

^22-23 Topa in hih bangin ci hi: “Note in sisan sungah na khe uh silin, na uite un galteʼ sisan a liak theih nadingin Bashan mual panin galte la khiakikin, tuipi thuk sung panin ka kai khiakik ding hi,” a ci hi.

²⁴ Pasian aw, ka Kumpipa, keima Pasian, a zahtakhuai takin biakinn sungah na paina kimu hi.

²⁵ A masa-in lasate, a nunungin tamngai tumte, a laizang ah nungak khuangtumte in:

²⁶ “Israelʼ suanlekhakte aw, mipi kikhopna sungah Topa Pasian phat un!” ci uh hi.

²⁷ Amauteʼ lakah a mi tawm pen Benjamin-te a mapi-in om a, amauʼ zomah Judah kumpite le a mite, Naftali kumpite le a mite ahi uh hi.

²⁸ Pasian aw, na vangliatna kilangsak in. Kote adingin a hong bawlsak Pasian aw, na thahatna hong lak in.

²⁹ Jerusalem-a na biakinn hangin kumpite in nang tungah letsong hong puak uh hi.

³⁰ Pumpeeng lak a teeng Egypt mite - tua ganhingte, bawngtal hon, bawngnote tai gawp in. Siah a lunggulhte tuancil inla, gal a uuk mite thehthang gawp in.

³¹ Egypt gam panin sumngo la khiasak inla, Pasianʼ tungah thungetna-in Ethiopia gam a khut zansak mengmeng in.

^32-33 Leitung kumpi gamte aw, Pasianʼ tungah la sa un. Vantung, tanglai vantung a a tuang Topa phatna la sa un. Ngai un, ama aw, a vanglian mahmah ama aw hong ging khiasak hi.

³⁴ Israel-teʼ tungah a lian, Pasianʼ hatna pahtawi un; ama vangliatna vantungah om hi.

³⁵ Israel-teʼ Pasian, ama biakinn sungah zahtakhuai mahmah a, ama mite tungah vangliatna le hatna a pia hi. Pasian in thupha ngah tahen!