Late 66 - Tedim Bible Revision 2017

Pasianʼ Nasep A Lamdangte Phatna

¹ Leitung mi khempeuh aw, Pasianʼ tungah lungdamna aw ging phasak un.

² Ama minthanna sa unla, ama tungah minthanna pia un.

³ Pasianʼ tungah thu gen unla, “Nangma bawlnate bangzah ta-in dipkuathuai! Na vang lian mahmah ahih manin na mai ah na galte in nang hong mai-et uh hi.

⁴ Leitung mi khempeuh in nangmah hong bia uh hi. Amaute in nangmah phatna la hong sak uh a, nangma minphatna la hong sak uh hi,” ci-in gen un.

⁵ Hong pai unla, Pasianʼ sep sate mu un. Miteʼ lak a a bawlnate ah amah dipkuathuai hi.

⁶ Amah in tuipi tui pen lei keu suaksak a, i pu i pate in a khe uh tawh tua tuipi na kantan uh hi. Tua bangin ama nasepna hangin eite i lungdam hi.

⁷ Ama thahatna tawh a uk ngitnget pa, ama mit tawh minamte a encik ngitnget pa, mi lehdote in langpan kei uh hen.

^8-9 Mite aw, a hingte lak a a hong kem pa, i khe a hong taalsak lopa, eiteʼ Pasian phat un. Amah phatna aw kizasak tawntung un.

¹⁰ Bang hang hiam cih leh Pasian aw, kote na hong sin khin a, mei tawh ngun a kisin bangin kote na hong sin khin hi.

¹¹ Nangmah in ngen sungah kote na hong tungsak a, ka nungzang uh ah van gikpi na hong suan hi.

¹² Ka galte uh nong tuancilsak a, tui le mei lauhuainate ka thuak uh hi. Ahih hangin nangmah in a tanzau munah kote nong paipih hi.

^13-14 Meihal biaknate tawh nangma inn sungah kei ka hong pai ding hi. Ka lungkham laitakin ka muk pan a a ging khia, ka kam a ka thuciamte nangma tungah kong pia ding hi.

¹⁵ Ganhing thaute tawh meihal biaknate, tuutal a biakna khute tawh biakna kong pia dinga, bawngtalte le keelte tawh nangmah biakpiakna ka bawl ding hi.

¹⁶ Pasian a zahtakte khempeuh aw, hong pai unla, hong za un. Kei-aʼ dinga ama bawl sate kong gen ding hi.

¹⁷ Ama tungah huhna ngenin nakpi takin ka kiko a, lasakna tawh amah ka phat hi.

¹⁸ Ka lung sungah mawhna kem leng, Topa in keima thu hong ngai lo ding hi.

¹⁹ Ahih hangin Pasian in, keima thu hong ngai khin taktak a, keima thungetna aw, hong don khinzo hi.

²⁰ Amah in keima thungetna hong nolh loin, keima kiang panin a itna kip la khia lo ahih manin Pasian in thupha ngah tahen!