Late 63 - Tedim Bible Revision 2017

Pasian Lunggulhna

¹ Pasian aw, keima Pasian na hi hi. Nangmah kong zong a, ka lungsim khempeuh tawh nang kong deih hi. Tui om lohna gam keu bangin ka pumpi bup in nang hong deih hi.

² Tua ahih manin biakinn sungah nang mahmah le na vangliatna na minthannate kei hong musak in.

³ Nuntakna sangin nangma itna kip hoih zaw ahih manin nangmah kong phat ding hi.

⁴ Tua ahih ciangin ka nuntak lai teng nang kong phat dinga, ka khutte hong laam to-in thu kong ngen ding hi.

^5-6 Ka lupna tungah nangmah hong ngaihsunsunin, zan thapai-in kong lungngaihngaih ciangin guhngek le sathau ne bangin ka lung tai mahmah a, lungdam mahmahna tawh nangmah phatna la ka sa ding hi.

⁷ Bang hang hiam cih leh kei a hong huhpa na hi a, nangma hutna sungah lungdamin la ka sa hi.

⁸ Nangmah kong bel a, nangma taklam khut in keimah a hong len hi.

⁹ Ahi zongin thah dingin kei a hong zongte, lei thukpi sungah pai suk ding uh hi.

¹⁰ Gal sungah amaute si ding uh a, ngiateʼ an suak ding uh hi.

¹¹ Ahi zongin Pasianʼ hangin kumpipa lungdam dinga, Pasian tawh thuciamna a nei khempeuhte zong minthang ding uh hi. Bang hang hiam cih leh zuau thu a gen kam khempeuh kihubing ding hi.