Late 61 - Tedim Bible Revision 2017

Pasianʼ Hut ding Ngetna

¹ Pasian aw, ka kikona aw hong za inla, ka thungetna hong ngai in.

² Ka lungsim a neu ciangin, leimong panin nang kong sam hi. Keimah sangin a sang zaw suangpi tungah hong paipih in.

³ Bang hang hiam cih leh nang, keima bukna na hi a, galteʼ langah tausang muanhuai na hi hi.

⁴ Na buk sungah hong omsak tawntung inla, nangma khateʼ hutna sungah lungmuangin hong omsak in.

⁵ Bang hang hiam cih leh Pasian aw, ka thuciamnate khempeuh nangmah in na za khin a, nangmah a hong zahtak miteʼ ngah dingte keimah nong pia khinta hi.

⁶ Kumpipa khantosak inla, khang tawntungin nungtasak in.

⁷ Pasianʼ mai ah amah om ngitnget henla, ama itna kip le a thumanna in amah kem tahen.

⁸ Tua ciangin nisimin ka thuciamnate bangin gamta-in, na minphatna ka sasa ding hi.